Atdareita Vikipedeja latgaļu volūdā!

Niu pasaulī pošu popularuo eņciklopedeja i latgaļu volūdā! Verīs sātys lopāLatgaļu Vikipedejis logo http://ltg.wikipedia.org !

Vikipedeja irā daudzivolūdeiga škārsteikla eņciklopedeja ar breivu turīni. Vysa eņciklopedejis turīņa autori irā breivpruoteigi ļauds. Sevkurs, kas tur škārsteikla daslāgumu, var tikt par rakstīņu autoru ci skaiteituoju. Projektu atspaidoj napeļneiguo organizaceja „Vikiviesteitivu Fonds”, kura daboj pazīdu nu vysa pasauļa. Niu eņciklopedeja irā sataiseita 267 pasauļa volūduos i kūpā irā pīraksteits vaira kai 18 milijoni rakstīņu.

2001 gods janvara mienesī atdareja pyrmū eņciklopedeju anglīšu volūdā. Na par ilgu atsaroda taidi poši projekti i cytuos volūduos – 2003 gods juņa mienesī atdareja Vikipedeju latvīšu volūdā. Vikipedeja irā pīktuo poša popularuo sātys lopa ASV, sastuo Vuocejā i vīnpadsmituo poša popularuo lopa Latvejā.

2005 gods decembra mienesī suocēs dorbs pi latgaļu Vikipedejis testa versejis. Deļ vysaižu nabyušonu eņciklopedeju latgaliskai div reizis atmete – nabeja volūdys koda, nabeja cīši aktivu dalinīku i t.t. Tok 2011 gods marta mieneša 18 dīnā Vikipedeju latgalīšu volūdā gols golā atdareja! Niu latgaļu volūdā irā jau vaira kai 450 rakstīņu ap Latgolys i pasauļa temom.

Deļkuo myusim vajag taidu eņciklopedeju? Tei irā vareiba raksteit i skaiteit latgaliskai. Da šam latgaļu volūdā eņciklopedejis i vysā gruomotys ap tik plošu temu lūku navā bejušs. Tei irā vareiba pīraksteit kū naviņ svareigu ap Latgolu i naaizmierst. Tei irā vareiba izaraisteit volūdai tuoļuok par sātys slīksni i modernā ceļā vadynuot Latgolys ļauds lītuot sovu volūdu. I vēļ – informaceja Vikipedejā namoksoj nikuo!

Vadynuojam atīt par paleigu Vikipedejis dorbā:

  • škārsteikla lītuotuojus ar lobu tehniskū guoduošonu;
  • škārsteikla lītuotuojus ar lobom latgaļu rokstu volūdys zynuošonom ci gribiejumu īsavuiceit;
  • škārsteikla lītuotuojus, kas tur ci var sagatavēt daudzi fotografeju (ap Latgolu i juos vītom),
  • sevkuru, kurs gryb aktivai pīsadaleit latgaļu vikipedejis dorbā i tuoļuokraisteibā.

Sataiseisim poši sovu eņciklopedeju! Paruodeisim Latvejai i vysam pasauļam, ka irā taida latgaļu volūda! Beigsim žāluotīs, ka Latvejis Republika nanūdrūsynoj latgaļu volūdys raisteibu – raisteisim poši!

Kai tys izaver? Puorskaiti itū: Leiksnys katuoļu bazneica ci Latgaļu pīrunys

Komentari