Lukaševiča i Seikstys-Deksnis gruomotu prezentaceja

Sastdiņ 16. aprelī Reigā, gruomotneicā “Satori” nūtyka Līgys Seikstys-Deksnis gruomotys-performancis  “Herbārijs aba sīna nikaida” i Valentina Lukaševiča aiļu kruojuma “Bolti burti” atvieršonys svātki.

Vairuok informacejis par obejom gruomotom: http://lgsc.lv/latgalisu-ailiniki-jaunumi/

Pasuokumā pīsadaleja ari muzykanti “Arvids i Ilze”, kas spieleja vysaidys latgaliskys melodejis kai īrostajā, tai ari naīrostā variacejā. Kai pyrmuo par sovu gruomotu i tuos ideji pastuosteja Līga Seiksta-Deksne. Juos gruomota ir unikala ar tū, ka tei ir radeita tikai pīcūs eksemplarūs – rūkrokstā i kotrai izlīkūt unikalus pašdareitus uodys vuokus. Kotrā gadejumā itaida jauna ideja aiļu (dzejis) pīduovuojumam, kas reizē ari styprai atguodynoj sovulaik druksy aizlīguma laikūs raksteituos Andriva Jūrdža gruomtys. Juoatzeimej, ka pasuokuma laikā vīnu nu ratajim Līgys gruomotys eksemplarim varēja īsaguoduot par 100 Ls. Ka ir kaidam interese īgiut taidu šedevru sovā gruomotu plauktā, sasazynojit ar pošu autori.

Valentinam Lukaševičam itei gruomota “Bolti burti” ir jau trešuo, i kai pats autors smej – vysys treis izdūtys leidzeigā stilā, deļ tam var ari pi reizis skaiteit, ka tuos ir kai Lukaševiča kūpūtūs rokstu suokuma izdavumi. Vaļuks kuotasūšajim apstuosteja sovu ailinīka filosofeji i truopeigi eisai raksturova sova raksteišonys stila konceptu. Gruomota izdūta Latgalīšu kulturys centra izdevnīceibā 500 eksemplarūs. Juoatzeimej, ka dīnu pyrma gruomotys prezentacejis, 15.aprelī Valentins Lukaševičs uzjimts ari par bīdreibys “Latgolys Saeima” bīdru.

Piec oficialuos dalis sarunys, puorrunys vaicuojumi, veina i kuo cyta baudeišona kai gruomatneicā “Satori” tai ari turpynuojums kopeineicā “Leningrad”.