Latgolys iergeļu dīnys 2011

jureits 12. Juļs, 2011. gods Comments Off on Latgolys iergeļu dīnys 2011
Ūtrais festivals “Latgolys iergeļu* dīnys” nūtiks 2011. goda 19.-24. julī Latgolys katuoļu bazneicuos. Festivala mierkis ir popularizēt iergeļspielis kulturu i latvīšu iergeļmuokslu, kai ari atbaļsteit iergeļu uzturiešonu i apkūpi. Latgolys iergeļu dīnys īguoduotys kai labdareibys pasuokums – īeja koncertūs par zīduojumim.

Festivalā uzastuos jaunī i talanteigī muzykanti: Diāna Jaunzeme, Iveta Pelše, Ilze Vizule, Ilona Birģele, Jolanta Barinska, Larisa Carjkova, Guna Skrima, Jacinta Bicāne, Ruta Birzule, Ance Purmale, Daiga Maskaļūne, Madara Behmane, Līga Kuzmane, Agnese Urka, Baiba Betlere, Jana Aņisimova, Laura Reksne, Laura Struķe, Jānis Trūps, Ilze Grēvele, Renāte Stivriņa i citi.

Itūgod Latgolys iergeļu dīnu ītvorā nūtiks divi eipaši koncerti: 19.julī Daugavpilī muzicēs tūpušī iergeļnīki – muzykys vydsškolu audziekni, sovukuort, 22. julī Stiernīnē nūtiks iergeļu muzykys nakts koncerts Varakļuonu nūvoda svātku ītvorā – piec laiceiguos dzeivis svātku pasuokumim īeimūt bazneicā, visi aicynuoti atsapyust i puordūmuot gareiguos vierteibys.

Turpynojūt tradiceji, piec koncertiem klauseituojim byus īspieja apsavērt instrumentu demonstriejumus, uzdūt vaicuojumus iergeļnīkim i izmeiginuot sovus spākus, īzajiutūt iergeļnīka vītā!

* Iergelis – varganis (tekstā atstuots festivala organizatoru lītuotuotais vuords)

Festivala nūrise

  • DAUGAVPIĻS VYSSV. JAUNOVYS MARRJIS BEZVAINEIGUOS ĪJIMŠONYS DRAUDZIS BAZNEICA – 19. juļs plkst. 17.00
  • MALNOVYS JAUNOVYS MAREJIS – RŪŽUKRŪŅA KARALĪNES DRAUDZIS BAZNEICA (Kuorsovā) – 20. juļs plkst. 12.00
  • LEIKSNYS VYSSVĀTUOS JEZUS SIRDS DRAUDZIS BAZNEICA – 22. juļs plkst. 15.00
  • STIRNĪNIS SVĀTUO LAURENCIJA ROMYS KATUOĻU DRAUDZIS BAZNEICA – 22. juļs plkst.21.00 (nakts koncerts)
  • NAUTRĀNU JAUNOVYS MAREJIS BEZVAINEIGUOS ĪJIMŠONYS DRAUDZIS BAZNEICA (Rogovkā) – 23. juļs plkst. 13.00
  • RĒZEKNIS JEZUS SIRDS KATEDRALE – 24. juļs plkst. 12.00

Ituo goda festivalā savuoktī zīduojumi tiks nūdūti iergeļu restauracejai vīnā nu skaistuokajom sakralom celtnem Latvejī – Pasīnī.

PASĪNIS SV. DOMINIKA DRAUDZIS BAZNEICA
Adrese: Pasīne, Pasīnis pog., Ludzys nūv., LV-5732
Prāvests: KUPČS JUOŅS

Iergelis: 1 manuaļs ar pedali, 12 registri (suokumā 10), mehaniskuo traktura, vālais baroks, byuveitys 1765. godā (Viļņa). Šūbreid instruments cīš slyktā stuovūklī.

Komentari slāgti.