Kas i kai puorstuovēs Latgolu 11. Saeimā?

jureits 1. Augusts, 2011. gods 2
29.julī Rēzeknē bīdreibys „Latgolys Saeima” puorstuovi apsprīde i izvirzeja sovus prīšklykumus regionaluos politikys princypu īvīsšonai Latvejā i aicynoj vysys politiskuos partejis tūs īvāruot jau ituo rudiņa gaidamajā Latvejis Republikys 11.Saeimys ībolsuošonā, lai nūdrūšynuotu tymā Latgolys vieliešonu apgobola sabīdreibys eistynu puorstuovnīceibu:

1) Latgolā parteju sarokstūs juostartej tikai Latgolys cylvākim;

2) visim kandidatim jau pyrma vieliešonu ir juoapsajem:

– īsastuot par Latgolys interešu aizstuoveibu,

– kūpā ar citim nu Latgolys ībolsuotajim LR Saeimys deputatim veiduot regiona konsultativū padūmi – regulari sasatikt ar Latgolys pašvaļdeibu, uzjiemieju, sabīdriskūs organizaceju puorstuovim,

– regulari – vysmoz 2 reizes mienesī byut Latgolā iz pījimšoys laikim,

– deputata paleigam juostruodoj tymā vieliešonu apgobolā, nu kura deputats ir ībolsuots,

3) ka nateik piļdeitys pyrma vieliešonu dūtuos apsajimšonys, tod politiski atbiļdeigi juoatsakuop nu deputata omota i juodūd vīta nuokamajam kandidatam (vysmoz taidu īspieju pīpraseit ir juodūd juo partejis bīdrim i juo vieliešonu saroksta dalinīkim – lai taidā veidā par deputata dorbu voi bezdarbeibu ir morali leidzatbiļdeigi visi juo partejis kolegys).

Ite juoatguodynoj, ka 1917.godā Latgola pījieme lāmumu: kūpā ar Kurzemes i Vidzemes latvīšim dybynuot Latvejis vaļsti ar nūsacejumu, ka paturēs tīseibys pošim lemt par sovu volūdu, ticeibu, pašvaļdeibu, kai ari saimnīciskūs vaicuojumus. Dīvamžāļ, nivīna nu itom praseibom natyka jimta par pylnu, deļ tam jau tūlaik Latgolys delegati Satversmes sapuļcē nabalsova par Latvejis pamatlykuma apstyprynuošonu – kai redzam šudiņ, latgalīšu aizdūmys par itūs princypu naīvāruošonu bejušys pamatuotys.

Itamuos uorkuortys vieliešonuos Latgola ībolsuos tikai 15 regiona puorstuovus (pyrma goda – 16), attīceigi Reigā byus par vīnu vaira. (Voi kaids var pastuosteit deputatu sadalejumu pa vieliešonu apgobolim 1922. i 1992.godā?) Tys ir tikai vīns nu pīvadumim, kas paruoda Latgolys navīnleidzeigū stuovūkli pošu vaļstī i situacejis pakuopenisku pasaslyktynuošonu.

Deļ tuo bīdreiba „Latgolys Saeima” skaita, ka vajadzeigys pa eistam radikalys reformys, kab apturātu Latgolys dorbaspiejeigūs cylvāku izbraukšonu nu regiona i radeitu apstuokļus nūvadnīku atsagrīšonai Latgolā – vīns nu prīšknūsacejumu deļ tuo ir eistyna regiona interešu puorstuovnīceiba Latvejis parlamentā. Bīdreiba turpynoj konkretu prīšklykumu izstruoduošonu vysaiduos jūmuos (ekonomika, lauksaimnīceiba, pašvaļdeibys, uzjiemiejdarbeiba, kultura, izgleiteiba, volūda, plašsazinis leidzekli i.c.), kurus gotova pīduovuot eistynuošonai.

Komentari slāgti.