Deļ tim, kam nav laika puorskaiteit vysus Latgalīšu kulturys gazetys rokstus, pīduovojom eisu atsavieršonu iz tū, kas i kai tod beja raksteits i viesteits itymā nedeļā LaKuGā.

Par nedeli LaKuGā tyka publicāti 18 roksti par dažaidom ar Latgolys kulturu saisteitom temom.

Nedele suocās ar breneigu viesti par Puncuļu saimis nu Rēzeknis uzvoru LNT šovā „Dzīdūšuos saimis”. Ari īprīškejuos šova sezonuos latgalīši beja tyvi uzvorai, nu nazkai drupeit datryuka.

Pyrmudiņ atsavierem ari iz 30. novembra Andrejdīnys pasuocīni Rēzeknē. Itam nūtykumam LaKuGā veļteiti vasali diveji roksti – vīnā intervejis ar Raibū Suni i Uoksta capuris īgivieju Māreiti Krasnobaju, bet ūtrs deļ tim, kas nabeja pasuocīnī, bet seikumūs gryb izzinuot, kai tī guoja.

Nedeli pyrma izsludynuojom jaunuos spēlis „Latgalīšu DOMINO” konkursu, i ituos nedelis pyrmudinē izzinuojom uzvarātuoju. Taipat pyrmudiņ stuostejom par grupys „Boltī luoči” jaunū koncertprogramu „Ziemas pasaka”.

Itei nedele bejuse boguota ar muzykalim nūtykumim. Grupa „Krampis” aicynuoja jūs atbaļsteit konkursā „BURKA”, latgalīšu grupys „Dabasu Durovys”, „Green Novice”, „Krampis” i dzīduotuoja Laura Bicāne īlyudze iz koncertu „Taiseits Latgolā”, kai ari grupa „Dabasu Durovys” klauseituoju viertejumam pīduovoja sovu jaunuokū dzīsmi „White” ci latgaliskā versejā „Bolts snīgs”. Koncerta biļdis apsavērt, dzīsmi pasaklauseit – tū vysu var vēļ arviņ izdareit LaKuGā.

5. decembra vokors ar apbolvuošonys ceremoneju nese prīceigys viests Baļtinovys golam – Anita Ločmele aba Danskovīte par sovu Ontonu i Anni sajāmuse AKKA/LAA Autortīseibu bezgaleibys bolvu. 6. decembrī sveicom opolajā dzeivis jubilejā ari filologu, gruomotu autoru i ābeču kolekcionaru Juri Cybuli!

Tim, kam pošim pateik dzīduot i izastuot iz skatuvis, nūdereiga varātu byut informaceja par jaunū koncertšovu „Dzīdi sovai piļsātai!”, kura atlasis i koncerti nūtiks ari Bolvūs i Leivuonūs, tai ka – tuos pusis ļauds, siļdit bolsus i spūdrynojit kūrpis!

Nedelis laikā izskaneja ari vairuoki aicynuojumi iz dažaidim kulturalim pasuocīnim – iz Bolvu nūvoda dramatiskūs kolektivu skati, iz „Viesturiskūs cymdu i zeču” izstuodi Rēzeknē kai ari jaunnedeļ Raiņa sātā „Berkenelē” nūtiks La-La-Dra.

LaKuGā izskaneja na viņ kulturali aicynuojumi, bet ari sportiski i sabīdriski svareigi. Nu sportiskuo gola – HK „Dinamo Rīga” Latgolys fanklubs puļceja fanus kūpeigam braucīņam iz Reigu, kab atbalsteitu komandu kluotīnē, bet sabīdriski svareigi latgaliskajai kulturai byutu jauni NEPLP lūcekli, kas dūmuotu ari par regionalajim medejim i latgalīšu volūdu medejūs.

Trešdiņ atsavērem ari iz folklorys festivala BALTICA skašu nūrisi Latgolā, i sevkuram LaKuGa skaiteituojam beja (i vēļ arviņ ir) īspieja pabaudeit koč kū nu latgaliskuo folklorys video formatā.

Naiztikom ari bez kasnedelis tradicionalajom lītom – jiusu viereibai kai vysod beja ari LR4 raidejums „Latgolys Vuords” ar Bronislavu Sprydzānu prīškgolā. Ituos nedelis raidejumā saruna ar rakstnīci Moniku Zeili, Ivars Magazeins par Sylajuoņu izlūksnis eipatneibom, Lideja Leikuma par vuorda dīnom i dīnu vuordim, saruna ar Latgolys pietnīceibys instituta direktoru Henrihu Somu.

LaKuGys nedeļu kai jau Adventa laikā nūslādzam ar simbolisku svecis īdegšonu. Šudiņ izskaņ aicynuojums iz prīcu. Gaudete!

Tai paguojuse nedeļa Latgalīšu kulturys gazetā.

Ka Tev ari ir kas stuostoms cytim, ziņoj i roksti info@lakuga.lv