Folklorys kūpai “Olūteņi” byus 15 godu jubilejs

27. decembrī 18 stuņdēs Dagdys nūvoda Tautys nomā nūtiks folklorys kūpys “Olūteņi” 15 godu jubilejis pasuocīņs “Caur godim skaņ myusu dvēslis dzīsme…”.

.
Folklorys kūpa “Olūteni” sevi dasaceja 1996. goda Zīmyssvātkūs, kod nalela entuziastu grupa, piec Andrupenis draudzē savuoktuo materiala, iztaiseja pyrmū programu, kuru pīduovuoja plašuokai sabīdreibai.

.
Mes otkon sasatiksim Zīmyssvātkūs. Zīmyssvātki ir Saulis atsagrīzšonuos laiks, fiziskuos i gareiguos izaugsmis, augleibys i gaismys cykla atskaitis punkts, centrs i suocīņs. Taipat mes kotru godi atsagrīžam zīmys vystymsuokajā laikā, kab sevi sakuotuotu, izsijuotu pelavys nu gryudim, svešu nu sovejuo, kab īītu jaunā godā i dzeivis cyklā ar izvieteitū gryudu kruojīni, kuru varātu siet sovā zemē i dvēslē, kab byutu kū kūpt i audzēt, īšyupuot Lelajā dīnā, izdzīduot Juoņūs, īvuokt Mikeļūs i cytūs Zīmyssvātkūs izvērtēt pīnasumu.

.
Itymā reizē mes izvērtēsim na tik vīna goda pīnasumu, nu jau vasalu 15. Par itim godim tyka izzinuots i atjaunuots Dagdys tautystārps, kolektivs pīsadaleja trejūs Starptautiskajūs folklorys festivalūs “Baltica”, Starptautiskajā folklorys festivalā Mozarē (Boltkrīvejā), Pūlejā, Boltu vīneibys dīnā Lītovā, XXIV Vyspuorejūs Latvīšu dzīšmu i XIV Deju svātkūs, ar Uzslovu atsagrīze nu Vosorys dzīduošonys svātkim Reigā, īgive 23 Uzslovys par vītejūs masku tradicejis atjaunuošonu i izcilu izruodeišonu, pīsadolūt 11 Starptautiskajūs masku tradiceju festivalūs i vēļ daudzūs cytūs pasuocīņūs, kur nese tautā Dagdys nūvoda boguotū kulturys montuojumu. Par latgalīšu tradicionalū folklorys vierteibu kruošonu i populariziešonu sajieme Latgolys planavuošonys regionu Atzineibys rokstu, kas ir augstuokais Latgolys regiona apbolvuojums.

.
Tikkū rudini pa vysu Latveju izskaneja folklorys kūpu i etnografiskūs ansambļu skatis, dūdūt īspieju kolektivim ceļt gaismā nūvodu boguotū kulturys montuojumu i izceineit ceļazeimi iz Starptautiskū folklorys festivalu Baltica, kurs jaunā godā nūtiks Latvejā. Folklorys kūpa “Olūteņi” skatē īgive 43 punktus, leidz ar tū jau vairuokus godus piec kuortus nūturūt I kategoreju i īpsieju puorstuovē Dagdys nūvodu festivalā Baltica.

.
Mes vysi asam amatieri i veļtejam darbeibai folklorys kūpā lelu dali sova breivuo laika. Mes vuicamīs i neam tuoļuok pasaulī Dagdys nūvodā savuoktū i pīraksteitū folklorys materialu.

.
Jubilejis pasuocīnī puļcēsimīs, kab sasatiktu ar vysim, kam ryup myusu seņču tradicejis, kab pabyutu kūpā ar cylvākim, kas ir kuplinuojušs folklorys kūpu i, kab pasateiktu tim, bez kurim nav īdūmuojama myusu pastuovēšona.

.
Meili aicynuoti vysi, kas meiļoj tautysdzīsmi!

.
Inta Viļuma
Dagdys nūvoda folklorys centra i folklorys kūpys “Olūteņi” vadeituoja


“Olūteņi” XII Starptautiskais masku tradiceju festivalā

.

“Olūteņi” – Pusrītā(i) saule lēca

.

Print Friendly, PDF & Email

Kalenders

Mar
28
Cat
18:30 Izruode “Divejis vyrtuvē, naskai... @ Daugovpiļs teatris
Izruode “Divejis vyrtuvē, naskai... @ Daugovpiļs teatris
Mar 28 @ 18:30 – 20:00
Izruodis pamatā ir ukraiņu dramaturga Aleksandra Mardaņa luga “Muotis i meitys” (“Дочки-матери”), lugu latgaliski tulkuojuse Kristīne Veinšteina. Tei byus gondreiž kriminala komedeja Olega Šapošnikova režejā i viesteis par div liktiņa nalutynuotom sīvītem, kurys par speiti vysim[...]
19:00 Grupys “Galaktika” albuma prezen... @ CATA kulturys noms
Grupys “Galaktika” albuma prezen... @ CATA kulturys noms
Mar 28 @ 19:00 – 21:00
2024. gods zīmā i pavasarī – nu janvara da apreļa – popularuo šlagermuzykys grupa “Galaktika” dūsīs Latvejis koncerttūrē, kurys laikā tiks prezentāts ari jaunais albums “Mums pieder tik daudz”. Koncerti nūtiks gondreiž vysu Latvejis piļsātu[...]