Lobdareibys koncerts “Iz engeļa spuorna”

Portals lakuga.lv 26. Decembris, 2011. gods Comments Off on Lobdareibys koncerts “Iz engeļa spuorna”

Pīktdiņ 30. decembrī 17 stuņdēs Rēzeknis Sv. Treisvīneibys bazneicā nūtiks Zīmyssvātku lobdareibys koncerts „Iz engeļa spuorna”. Pasuocīni organizej rēzeknīši, kas tyvi saisteiti ar muzyku, kai ari Latgolys muzykalī jaunīši, kas pošu šaļti studej ci struodoj cytuos Latvejis piļsātuos.

Koncerts īzeimēs eipašū laiku storp divejim goda jaukuokajim svātkim – Zīmyssvātkim i Jaunū godu, kuru eipaši magiskajā gaisūtnē sevkurā sirdī īleist gaišs syltums, gaidys, cereibys i speiteiga apsajimšona kliut lobuokim. Koncerta laikā tiks vuokti zīduojumi rēzeknīšam Krišjuoņam (21 gods), kuram pošu reizi cīši vādzeigs myusu vysu atbolsts uorstiešonys kursa izsuokšonai. Šaļtim vāga tik drupeit, kab cylvāks myusim sūpluok, ari tys, kumu mes i namanejom iz īlys, veikalā ci kuopņutelpā, ar myusu paleidzeibu varātu izaveseļuot i dzeivuot.

Paguojušā godā leidzeigā lobdareibys koncertā „Veļtejums” Latgolys jaunīši apsavīnuoja, kab paleidzātu mozai meitineitei Elizabetei pilnvierteigi dzeivuot. Tika savuokti zīduojumi gondreiž 300 latu apmārā, kas beja puse nu vādzeiguos summys, kab Elizabetei varātu īsaguoduot acs protezi. Ituo koncerta organizatori i dalinīki car, ka ari itymā godā cylvāku sirdīs atsarass vīta vīnam sirdsškeistam dorbam.

Koncertā „Iz engeļs spuorna” muzicēs Latgolys jaunīšu kūrs „Sono Juvenis” (Reigā – Rēzekne), vokalais ansamblis „Pērles”, vokalais ansamblis „Knifs”, bruoli Punculi, Juoņa Ivanova Rēzeknis muzykys školys bārnu kūrs i Juoņa Ivanova Rēzeknis muzykys vydsškolys Zīmyssvātku muzykaluo apvīneiba.

Mes carom, ka engeļa spuorna pīskuorīņs vīna eipaša jaunīša i juo tyvinīkim dzeivi padareis gaišuoku…

Sagataveja Baiba Urka

Latgolys jaunīšu kuors „Sono Juvenis”

.

Karteņā: Latgolys jaunīšu kūrs “Sono Juvenis”, foto Edeite Husare

Komentari slāgti.