Zīmyssvātku ailenis VI

LaKuGa 26. Decembris, 2011. gods Comments Off on Zīmyssvātku ailenis VI

Guntis Rasims

***

Salaveci, Salaveci
Tevi bārni gaida,
Vysu godu klausejuši —
Tān pi eglis smaida.

Varim smuki padoncuot,
Varim dzīduot dzīsmenis,
Tēts ar māmu prīcojās,
Dadzūt eglē līsmenis.

Izrūtuota egleite,
Piparkūkys smaržoj,
Mandarini, kampetys
Maņ vysvaira garšoj!

.

Aleksandrs Garančs

Zīmys reits

Aiz ladā koltim azarim i jiurom, tuoli,
Aiz zylgmojūšim mežim, kolnim snīguotim,
Lāc jaunai dīnai saule myrdzūša i skaista.
Nu kūkim sormā kruzuļaini greznuotim
Viejs klusi spūžūs lada vyzuleišus laista.

Dej storu līksmis zali ladainajuos ryutīs,
Dej snīga klajumūs ar myrdzu žylbynūšu,
Dej kūku zorūs, puorslys vyzuļoj i speigoj.
Puor soltū zemi, lejūt gaismys straumi kūšu,
I sastyngušū dzeivi – meiluo saule leigoj.

.

Augusts Egluojs

Latgolys bazneica Zīmyssvātku naktī

Naktī zylgā zam myrdzūšom zvaigznem,
Zvonim dzīžūt, Tu cylvākus sauc,
Gaismys pylna un svātuma pylna
Ar tūrnim boltim Tu myužeibā audz.

Pa vysim celim Tu sasauci ļaudis,
Lai ļautu gaismai puori jim plyust,
Lai sveču gaismā jim kvāluotu sirdis,
Lai kryutīs īslāgtais sapņu spīts dyuc.

Ar boltym tūrnim kai pacaltom rūkom
Tu gaismys nuokšonu šai zemē lyudz,
Par tautys suopem, par izcīstom mūkom
Tu Liktiņu Liemiejam dzeivi šū syudz’.

Pa vysim celim Tu sasauci ļaudis,
Vystymsuokā naktī lai cereiba dzymst,
Paguotnē baiguo, ļauns liktiņs kū audis,
Lai vēsturis arhivu putekļūs grymst.

– Naktī zylgā zam myrdzūšom zvaigznem,
Zvonim dzīžūt, Tu tautu vēļ sauc,
Gaismis pylna un svātuma pylna
Ar tūrnim boltim Tu myužeibā audz.

Foto: Ilze Sperga

Komentari slāgti.