Raibīs Suņs Reigā. Atsavieršona iz gruomotys prezentaceju

2. februarī Reigā, 1/4 Satori rodūšajā telpā nūtyka Raibuo Suņa (eistajā vuordā Oskara Orlova) gruomotys “Pyrma syltī” golvyspiļsātys prezentacejis reize.

Raibuo stuosti, gruomotys fragmentu skaitiejumi mejos ar klauseituoju vaicuojumim, muzykalom pauzem nu Vucānu Jura i Rasimu Kristapa. Fragmentus nu gruomotys prezentacejis var nūsaklauseit ari LaKuGā.

.

Piec prezentacejis Raibīs Suņs pīkryta eisai intervejai ar LaKuGu:

Kaidys Tev sajiutys niu, kod gruomota – tys pyrmīs bārns – pasaulī jau ir mienesi? Kai ir saguojs?

Es uzskotu, ka ir saguojs… Es pot navaru saceit, vpi tys ir veiksmeigi, bet ažiotaža ir. Ir sajimtys vysaidys atsauksmis – gon švakys, gon lobys, bet tuos ir atsauksmis, i pamatuota kritika maņ vysod ir patykuse. Kotrā ziņā „Pyrma syltī” ir koč cik pamaneiti.

Kai es jiutūs? Es vīnkuorši niu asu taids kai atsabreivuojs nu tuo etapa, kas beja leidz šam – gruomotys sagataveišonys. Es jiutūs breivs. Kod maņ vaicuoja – kas veicynuoja gruomotys izdūšonu, es atbiļdieju, ka laiks. Ka ni šūgad, ta varbyut cytu god Raibīs vaira nabyutu tik populars… varbyut ni populars, bet aktuals – ap jū piec goda nabyutu ažiotažys. Es dūmoju, ka latgalīšu literaturai vādzeja, koč kū, ka ni svaiguoku, ta vysmoz sovaižuoku.

Kai ir, īsapatyka gruomotu izdūšona?

Nu princypā nui. Es pasasoku vysai sovai komandai – Muorai, Arturam i Valentinam, ar kuru paleidzeibu beidzūt tys gola produkts ir nūdūts sabīdreibai. Gruomotu izdūšona – tys na suok īsapatikt, bet jau patyka.

Kaidi dorbi Tev īplānuoti itymā godā. Dzierdiejom jau koč kū par „Kukužu” centru.

Nui, bīdreibai „Kukuži” ir juoatkluoj pošim sovs jaunīšu centrs Drycanūs. „Kukužim” byus 5 godi i mes dūmojam tī ari iztaiseit pusgrandiozus jubilejis pasuocīņus. Beidzūt byus pošim sovys telpys!

Literarūs dorbūs?

Pagaidom vēļ nazynu… Cikom es rokstu na eisti idejis, bet kai asu nūsaucs – aizmetņus, kab izakristalizej, kas byus tuoļuok. Nu ituo goda plans varātu byut komiksi (klausīs prezentacejis fragmentā – LaKuGa) – izstruoduot i izdūmuot, kas tī varātu byut.

I privati kai Oskaram? Rēzeknē cylvāki asūt gribiejuši zynuot, kod Tu ženeisīs…

Kod es ženiešūs i cik bārni, nui… Tū ir gryuši pasceit. Bet Oskaram ir plani skaisti pabeigt semestri, kab septembri varātu aizbraukt ERASMUSā (studentu apmainis programa – LaKuGa) iz Pūleju. Itū semestri nasaguoja – sovu laiku pajam dorbs „Kukužūs” i cytys sabīdriskuos aktivitatis, deļ kuo vysa navar paspēt.

.

.

Kartenis: Raibuo Suņa gruomotys “Pyrma syltī” prezentaceja Reigā, foto Kristīne Pokratnīce, Edeite Husare

 

Print Friendly, PDF & Email

Komentari

Kalenders

Mar
30
Sai
15:00 Izruode “Divejis vyrtuvē, naskai... @ Daugovpiļs teatris
Izruode “Divejis vyrtuvē, naskai... @ Daugovpiļs teatris
Mar 30 @ 15:00 – 16:30
Izruodis pamatā ir ukraiņu dramaturga Aleksandra Mardaņa luga “Muotis i meitys” (“Дочки-матери”), lugu latgaliski tulkuojuse Kristīne Veinšteina. Tei byus gondreiž kriminala komedeja Olega Šapošnikova režejā i viesteis par div liktiņa nalutynuotom sīvītem, kurys par speiti vysim[...]
Mar
31
Svā
all-day Izstuode “Latgales keramikas stā... @ Daugovpiļs Muola muokslys centrs
Izstuode “Latgales keramikas stā... @ Daugovpiļs Muola muokslys centrs
Mar 31 all-day
Da 31. marta Daugovpiļs Muola muokslys centra izstuožu zālē apsaverama Tautys lītiškuos muokslys studejis “Latgale” izstuode “Latgales keramikas stāsti”, kurā apkūpuoti studejis lobuokī dorbi, viestej informaceja Daugovpiļs piļsātys sātyslopā. “Kotrys dorbs sovā byuteibā ir unikals i naatkuortojams, kotram[...]