Latgalīšu meilys aiļu izlase II

LaKuGa 14. Februars, 2012. gods 1
Ontons Slišāns

***

edz, kai tu atlidovi –

kai bezdeleiga nasdama leita viesti,

edz, kai tu apčieri mani –

kai apeiņa steiga apsaveji,

edz, kai tu maņ mutis devi –

kai dīvagūteņa pa lyupom bizineji,

edz, kai tu muna asi –

kai svecis līsmeņa korsta,

edz, kai tu kūpā ar mani –

kai skaideņa svuorpstā…

 

***

kotrā rudzupučis zīdā

radzu tovys acis,

kotrā cīlovenis čīpstā

dzierdu tovu bolsu,

kotrā uora vieja pyusmā

klausūs tovūs sūļūs,

kotrā leita pilis smuordā

jiutu tovus gluostus…

 

Līga Rundāne

Vysi vieji
Apgluosteiti
Vysi dabasi
Aizrunuoti
Maņ teve moz
Maņ šaļtim
Korstys lada pučis
Zeimejās
Es beistūs
Tovu pavasari
Apsaļdēt

 

Ontons Kūkuojs

Tu tikai pussekuņdi pasmaidieji,
bet man tys škita vasals godu simtnīks.
Tu tikai pussekuņdi pasmaidieji,
es jau bez pruota,
kai bārns, rūcenis plyvynojūt,
cauri Varšavai, Madridei, Vladivostokai,
Sibirejis kritalom puorpylnim mežim
pasauli apskriejs.

Otkol tepat
Ludzā, Stacejis īlā,
vēļ cereibā gailejūšs
iz tova breineiguo smaida,
kaut sekuņdis tyukstūšā daleitī
pazybūša.

 

Ingrīda Tārauda

 

Ivaram 94

navaru tevi izdūmuot

par daudz nu tevis maņ ir

kaids apsluopeits klīdzīņs

sveču īdegsme

īmirdze ustobā

smiļšu stundiņa sapleisšona

– – – – – – –

laiks apstuojs

ar tovu īīsmi

munā dzeivē

 

***

nanūzeimeiga ryuceiša

leluo mīlesteiba

pret upi

padareja trokus –

zemi i dabasus

 

 

Valentins Lukaševičs

 

***

Ka gribēs likt tevi cītumā, es tevi izpierkšu.

Puordūšu sātu, puordūšu mašynu,

Ar taksi tevi aizvesšu iz vīsneicu.

Aumūni lomuosim syudeigū dzeivi,

A tod nūkuopsim lejā kazīno.

Nivīna lūga. Mozenis lampenis.

A nu myusim speid gaisma. Kai dīnā.

 

Anna Rancāne

 

Pylnuotēs

 

Muna sirds tik pylna

ar tovim vuordim i tevi,

ka puori puorsalej

aiz krakla, naktssvīdrūs izmierkuša.

Naskaidrūs mūrgūs

pieški saceji: mīļoju tevi!

 

Nastaigoj šūnakt

pa pošu mienesnīka maleņu.

Munā pīktajā stuovā

vysi atbolsti tevi pīsauc.

Ka nanūkreit zemē!

Lobuok aizīsim viejputnī

ar snīgu

sasalauluot.

 

Jana Skrivļa – Čevere

 

***

Tu esi muns

mušpapeirs.

Pīlypu.

Raugūt liduot paceli,

pazaudieju spuornus.

 

 

Karonhisake

 

***

Nasumynoj mani Vaļuka dīnā

Deļkuo maņ tys banalais sorkonais papeirs

Ar nadzeivu mīlesteibu.

Es grybu eistu sirdi

Ar arterejom, pa kurom

Es varātu pludynuot prūm

Sovus papeira kugeišus.

 

Voldemārs Voguls

 

***

Nakts moti tovi –

Buras vējā,

Sapņu tylts

Storp tevi

Un storp mani.

Kaut pakolnā es rūsūs,

Kur tevis nav,

Kur sorkons muols

Še leigojās

Kai nīdre azarkrostā.

Munuos rūkuos

Muols teik dzeivs –

Lyuk teiksmu tylts

Storp tevi

Un storp mani.

 

Raibīs Suņs
***

Stulbi Tev atguodynuot Family Guy epizodis
i Braian Adams nu Kanādys,
ka Tev varbyut tys nainteresej.
Es Tevi sateiku puors dīnuos reizi,
kuruos narunojom skali.
Vīneigi munys dūmys,
kai Tev īt Tovā syudeigajā dorbā.
Daž zynu, bet nazaveru iz tovu gradzynu,
kas apmaukts pierkstā speiguļuj
īrastajā vokora saulē.
Es ari grybu taidu,
daž niule, tepat vysu prīškā…
bet taidai meitinei,
vajadzēs švīteigys kuozys ar bazneicu desertā.
I itys laikam saīt muns garuokīs dzejuļs koč kam,
skaitams kluseibā.
Tai es Tevi, ar Tovu rutinu
drupeit satikšu i redziešu.
Bet saprūtamu lītu i veseleibas dieļ napasciešu
– Lobdīn meitineit, Jius asot leidzeiga pošai Dabasu rosai.-

***

Tai pa eistam
naasu redziejs Tovus ceļgolus.
Koč dūmys maņ aizjimtys pylnys,
nabyut na ar sesejis temu.
Maņ Virzīņūs.
Blūdoj Tu.
Var vieju sagiut veļreiz.
Var.
Bet baile viņ tū īgruomotuot.
Tovs smuords
veļ munuos plaukstuos,
Leidz pazyud atmiņu spaiti,
iz boltom eksamena lopom
Kurymuos taipat, taipat
ir sazeimāti
Tovi kautreigī ikonys vaibsti.

***

Tei šmukuo galis puordevieja,
tei klusei galis kolnūs.
Tik graciozi nūsver
plaušenis i nīris,
spaida faršā svastiku
i gaida
princi boltā opel ascona.
Es apādu jū vysu
Ar vysu juos produkceju.
Tymā pat vokorā mes tusēsim vīnā bārā
i apakšveļā.
Tu mani naatpazeisi i es tevi saukšu par Ļubu
jo taišni tai ļubujus,
ļubujus,
jau pavysam n a i l g u laiku.
Kod dzeivnīku mīsu aiznadzeitēs
ikdīnā nūslēp ar franču manikiru
Tev par tū kauns
a maņ gon ir gona
vairuok, kai tev.
Ak, Ļuba, Ļuba, Ļubočka.

 

 

Komentari slāgti.