Aicynoj atzeimuot Starptautiskū Dzymtuos volūdys dīnu

LaKuGa 16. Februars, 2012. gods 4
21. februarī jau 12 godus vysā pasaulī piec Apvīnuotūs Naceju Organizacejis iniciativys atzeimoj Starptautiskū Dzymtuos volūdys dīnu, izceļūt volūdu kai kotrys kulturys pamatelementu, kas nu paaudzis paaudzē veiduojs gon materialū, gon namaterialū tautys kulturys montuojumu i kūpeigū pīmini.

Itymā godā UNESCO Latvejis Nacionaluo komiseja (LNK) aicynoj Dzymtuos volūdys dīnu veļteit saziņai ar cylvākim, kuri atsarūn uorpus Latvejis, kab kūpā sarunuos izcaltu dzymtū Latvejis vaļsts volūdu kai vierteibu i unikalū saikni, kas vīnoj i mudynoj atsagrīzt. Kod svešumā, dzymtuo volūda ir vīneigais tylts, kas vad pi tyvajim – saimis, rodim, draugim – i vysod dūmuos aizvad iz sātu.

UNESCO LNK rūsynoj itymā dīnā veļteit vuiceibu stuņdi, diskuseju, stuostu vokoru ci kaidu cytu pasuocīni dzymtajai volūdai i, izmontojūt informacejis i komunikaceju tehnologeju snīgtuos īspiejis, sasazynuot ar rodim, draugim uorpus Latvejis, kab kūpeigi izrunuotu i izcaltu, kū myusim nūzeimoj dzymtuo volūda, kaidu mes tū izjiutam i kai tū kūpam. UNESCO atguodynoj, ka mes kotrs asam sovys volūdys i vaļsts viestneši, i dzymtuo volūda ļaun myusim paust itū sovu unikalū pīdereibu vysā pasaulī!

UNESCO LNK leidz 17. februaram aicynoj informēt par planavuotajom aktivitatem, veļteitom Starptautiskajai Dzymtuos volūdys dīnai, rokstūt iz e-postu programmas@unesco.lv. Informaceja tiks apkūpuota, dalikta UNESCO LNK sātys lopā www.unesco.lv i izsyuteita medejim.

LaKuGa aicynoj Latgolā školu, biblioteku i cytu organizaceju reikuotajūs pasuocīņus naaizmierst ari par latgalīšu volūdu kai dzymtū volūdu!

 

Ir zynoms, ka 21. februarī Latgolys školuos nūtiks itaidi pasuocīni:

Rēzeknis nūvoda Drycanu vydsškolā nūtiks pasuocīns ar 2012. goda jubilaru – latvīšu ailinīku, rakstnīku i dramaturgu daiļdorbu publisku skaiteišonu.

Kruoslovys nūvoda pyrmaškolys izgleiteibys īstuode „Pīlādzītis” Dzymtuos volūdys dīnu atzeimuos ar tai veļteitu piecpušdīni i konkursu 5 i 6 godus vacim bārnim.

Daugpiļs 11. pamatškolā 1.-9. klašu kolektivi tiks īsaisteiti aktivitatēs, kuru mierkis ir atteisteit školnīku prasmi cīneit i izkūpt sovu dzymtū volūdu. Tiks apkūpuoti sokomvuordi par volūdys gudreibu.

Kuorsovys piļsātys pyrmaškolys izgleiteibys īstuode reikuos Aizgavieņa pasuocīni, īpazeistynojūt bārnys ar tautys tradicejom i latvīšu godskuortom, vuicūt tautysdzīsmis, stuostūt ticiejumus i skaidrojūs saisteibu ar dobus nūrisem, kai ari organizejūt ustobu rūtuošonu i tradicionalūs iedīņu gataveišonu.

Bolvu pamatškolā vysu februari nūteik volūdu mieness ar dažaidom aktivitatem – rūkrokstu konkursu „Jādzu raksteit gleiši!”, klusuos skaiteišonys stuņdem, volūdys piecpušdīnem, olimpiadem, zeimiejumu konkursu „Dzeivī burti”, izstuodi „Teici, teici, volūdeņa…” i daudzom cytom.

Komentari slāgti.