LKC izdevnīceibā izīt jauna gruomota par Latvīšu legionu

LaKuGa 17. Februars, 2012. gods 1
Latgolys Kulturys centra izdevnīceiba izdavuse jaunu gruomotu – Andris Gribuška „Karaveira guojums Latvīšu legionā” (Kareivja gaitas Latviešu leģionā).

Gruomotys autors ir 24 godus jauns students nu Preilim. Kai stuosta pots autors – pīminis i aprokstu par Latvīšu legionā pīdzeivuotū navā moz i tim pīsavīnoj ari itys izdavums, kas saturiski ir daudzi sovaižuoks kai īprīšk izdūtī. Gruomotys pamatā ir Pītera Stabuļnīka atmiņu pīroksti par legionā i piečuok izsyutejumā pavadeitū laiku, tymuos apraksteitī nūtykumi apstuosteiti plašuokā kontekstā. Gruomotai ir diveji mierki – īpazeistynuot ar Pītera Stabuļnīka guojumu karā i piec tuo i apsavieršona iz legiona ceiņom vyspuoreigi.

Ideja par gruomotu rodusīs jau 1995. godā, kod nūvodpietnīks i viesturnīks Ontons Anspaks vuoce materialus par Preiļu rajonu i apzynuoja īvārojamus nūvodnīkus, kuru vydā beja ari Gaļānu pogostā dzymušais Pīters Stabuļnīks. Izpietejūt pīzeimis par Pītera kara guojumu, atsakluojs, ka manuskriptam datryukst pora lopu (nakvalitativūs papeira lopu deļ), nu juo švakuos veseleibys deļ, tuos pīraksteit par jaunu nabeja vareibys.

2010. godā ar itom kara pīzeimem īsapazyna ari jaunizdūtuos gruomotys autors Andris Gribuška i dūma par gruomotu, koč puora eksemplarūs, kab saglobuotu vierteigū materialu, dzyma nu jauna. Pīzeimis tyka papyldynuots ar pietnīciskū materialu, kuru sagataveišonā izmontuoti latvīšu volūdā pīeimamī izdavumi i gazetu roksti (pa lelai daļai bejušūs karaveiru atminis i iz tom baļsteitī ceiņu aproksti).

Vaira par gruomotu i Pītera pīzeimem skaiti: http://www.lkcizdevnieciba.lv/

Komentari slāgti.