Boņuks 2011: lobuokuo alternativuo stila dzīsme

LaKuGa 22. Februars, 2012. gods Comments Off on Boņuks 2011: lobuokuo alternativuo stila dzīsme
Turpynojūt gaideit Latgalīšu kulturys Goda bolvys „Boņuks 2011” bolvu padūšonys ceremoneju. šudiņ īsapazeisim vaira ar bolvys pretendentim nominacejā „Lobuokuo alternativuo (ci underground) stila dzīsme” – muzykys stilam, kam kasdīna teik pīgrīzta mozuoka viereiba nu radeju i cytu medeju pusis.

.

Nominacejā „Lobuokuo alternativuo (ci underground) stila dzīsme” izvirzeiti (alfabeta seceibā):

Cieradryvu ansamblis „Cieradryvu polka”

EguceiC „Tuoli prūm”

Inlay „Gaisma kai dīnā”

Kapļi „Baby Vizma”

Valdis Metlāns „Virāžys”

 

Cieradryvu ansamblis „Cieradryvu polka”

Juoņu dīnys projekts, kurymā pīsadola daudzu latgalīšu muzykys grupu dalinīki Arņs nu „Dabasu Durovom”, Alvis nu „Green Novice”, Jurs nu „L.P.I.V.”, Uģis nu „Inde Indive” i cyti.

.

 

EguceiC „Tuoli prūm”

EguceiC (eistajā vuordā Edgars Bikse) ir puiss nu Gaigalovys pusis, kas ar muzyku saisteits jau paseņ, koč ari suokumškolys laikūs iz kori īt nagribieja i muzyka nainteresēja – vīneigi klauseitīs patyka. Piečuok suoca spielēt gitaru, pamatškolys beiguos ar klasisbīdrim beja izdūmuojuši kliut par lelim muzykantim, nu vyss tai ari palyka pi idejom. Ar laiku EguceiC apgiva muzykys taiseišonys programu FL Studio, pīsadalieja ar muzyku saisteitūs projektūs, uzlobojūt muzykaluos īmanis i vokaluos prasmis, taipat ari suoca radeit originaldzīsmis ar sovu muzyku i vuordim, kai ari taiseit remiksus cytom dzīsmem. Boņukam” izvirzeituo dzīsme „Tuoli prūm” īraksteita 2010. goda beiguos sadarbeibā ar Normundu Zušu („Galaktika”), nu radejis viļņus īraudzejuse 2011. goda martā.


.

Inlay „Gaisma kai dīnā”

Grupys „Inlay” pyrmssuokumi meklejami i atrūnomi jau ap 2006. godu. Grupys sastuovā dorbojās pīci jaunīši: Arita (vokals, teksti i meldejis), Ilze (vijūle), Viesturs (gitara), Arturs (bass) i Mārtiņš (ritms). Īvārojamuokī grupys sasnīgumi – “Okartis” simpateju bolva Latvejis Universitatis reikuotajā jaunūs grupu konkursā (2011) i uzvara konkursā “100 i 5 grami veseleibys i muzykys” (2011). Dzīsme „Gaisma kai dīnā” topuse eipaši muzykys festivalam „Muzykys Skrytuļs” i ir pyrmuo grupys „Inlay” pošsacarātuo dzīsme latgaliski. Dzīsmis teksta autors – Valentins Lukaševičs, muzyka – Arita Strode. Grupa car, ka dreiži saīs īraksteit ari dzīsmis studejis verseju.

.

Kapļi „Baby Vizma”

Literari-muokslinīciskys projekts. Bet klausīs, kai beja – jauns literats (Raibīs Suņs) i jauns muzikis (Arņs Slobožaņins) sasatyka plus, pīsadolūt Almai, kas ir vibraceju meistars, tyka izveiduoti “Kapļi”… Piečuok par itū vysu dazynuoja Koijōt (Kristaps Kaļiņins), i beja kluot ar sovim “Pareizajim Akordim”. Pyrma vaira kai četru godu projektam „Kapļi” roduos video klips dzīsmei „Pelis danci grīž”, kas pagaidom ir pyrmais i vīneigais.


.

Valdis Metlāns „Virāžys”

Bundzinīks, kurs bungys suocs spēlēt apmāram 4 godu vacumā i leidz školys pyrmajai klasei beja pasamajiejs kūpā ar tāva grupu (iz maiņom ar vacuokū bruoli) pi bungom nūspēlēt puora jubilejis, kuozu ūtruos dīnus i pat Leigū nakts balus. Izsuokūt školus gaitys, vysaida veida muzykaluos aktivitatis tyka pamastys. Atsagrīzšona pi bungu nūtyka 11. klasē, kod kūpā ar draugim Valdis sataiseja školus grupu. Vys tik izsuokūt studejis RTU, bungys okton iz kaidu šaļti tyka pamastys, bet 2006. godā bungu spēle atsuokta i bungys aktivi teik spālātys vēļ arviņ. Valdis spēlej grupuos „Green Novice”, „Inde Indive” i „Zemes Mala”, kai ari ir bejs vīneiguos latgalīšu emo/folk grupys „Gatavi Rudzi” gitarists. Gitaru gon saeimūt spēlēt rešuok, nu reizem rūnuos dažaidys muzykaluos idejis, lobuokuos nu kurom pīdzeivoj īrokstus i publisku atruodeišonu. Par dzīsmis „Virāžys” topšonu Valdis soka lelu paļdis sovim bīdrim nu grupom „Green Novice” i „Inde Indive” – par moralū i tehniskū atbolstu, Uģim Vylcānam par skanis piecapstruodi i pīsadaleišonu īrokstā i Kristapam Rasimam par īraksteišonys īspieji.

Komentari slāgti.