Nominacejā „Lobuokais izdavums / gruomota” iz bolvu kandidej (alfabeta parādā):

„Es soku. Tu soki. Puosokys par krīzi”

Līga Seiksta „Herbārijs aba sīna nikaida”

Ontons Slišāns „Labi, ka labi”

Raibīs Suņs „Pyrma syltī”

Valentins Lukaševičs „Bolti burti”

„Es soku. Tu soki. Puosokys par krīzi”

Gruomota „Es soku. Tu soki. Puosokys par krīzi” sastuov nu septeņu atsevišku burtneicu, kas sasītys saineitī ar eistu sovetskūs laiku papeira stiči. Kotrai burtneicai ir sovs vuoks i satura ruodeituojs. Vysi teksti skaitami latgalīšu rokstu volūdā. Vīnaidojūt raksteibu atbylstūši myusu laika ortografejis normom, īspieju rūbežuos saglobuoti kai attīceiguo laika raksteibys styls i leksika, tai individualī raksteibys principi i izlūkšņu īpatneibys. Pyrmajuos divejuos burtneicuos apkūpuotys latgalīšu tautys puosokys, kas salaseitys 19. i 20. g. s., trešajā i catūrtajā Marijis Andžānis, Fraņča Trasuna, Naaizmierstulis, Ontona Slišāna, Valentina Lukaševiča, Joņa Ryučāna un citu latgalīšu autoru literaruos puosokys, pīktajā – myusdīnu bārnu i jaunīšu stuosti ar laimeigom beiguom, kas nu vysys Latvejis salaseiti sadarbeibā ar LNB Bārnu literaturys centru, sastajā – 20. godu symta suokuma latgalīšu presis roksti par krīzi i myusu dīnu anekdoti par Latveju i politikim, septeitajā – fragmenti nu latgalīšu rūkroksta literaturys radzamuokus viersyunis Andryva Jūrdža kruojuma „Vysaidu zuoļu gruomota”. Gruomotys „Es soku. Tu soki. Puosokys par krīzi” izdeviejs ir bīdreiba “Latgolys Studentu centrs”. Idejis autoris Marita Papiņa i Ilze Sperga. Gruomotys vuoka dizaina autors Aldis Aleks. Itei puosoku gruomota ir bejuse kai tolka, kur rūku dalics na vīns viņ cylvāks, tai aplīcynojūt, ka kūpā puorvarama i krīze. Izdūšonu finansiejs Vaļsts Kulturkapitala fonds.

Līga Seiksta „Herbārijs aba sīna nikaida”

2011. goda aprelī izguojušuo gruomota „Herbārijs aba sīna nikaida” ir latgalīšu dzejneicys i žurnalistis Līgys Seikstys-Deksnis pyrmuo patstuoveiguo dzejis gruomota, kas topuse kai poligrafisks eksperiments – izdūta viņ 5 eksemplarūs autoris rūkrokstā ar muokslenīka Eināra Dekšņa taiseitu uodys īsiejumu. Gruomotys nadaudzī eksemplari nūklivušs dažaiduos privatuos i publiskuos bibliotekuos Latgolā i Reigā.

Ontons Slišāns „Labi, ka labi”

Pošuos 2011. goda beiguos izguoja Ontona Slišāna gruomota „Labi, ka labi”, kas ir 14., nu Dīvam žāļ ari pādejuo autora gruomota bārnim. Autora ideja bejuse dūt īspieju bārnim vuiceitīs na tik skaiteit latgaliski, bet ari guoduot latgaliski. Gruomotys ilustraceju muokslineica ir Rudīte Kaša. Gruomotys „Labi, ka labi” izdeviejs ir Z/S „Jākupāni”, i tuos izīšonu atbaļsteja Vaļsts kulturkapitala fonda Latgolys kulturys programa.

Raibīs Suņs „Pyrma syltī”

Raibuo Suņa debejis gruomotā ir īkļauti 12 stuosti, kas, poša autora vuordim sokūt, ir sagrupāti daudzmoz hronologiskā seceibā. Gruomotā var atrost gon jau dzierdietus stuostus, kas tykušs nūdāvāti ari par sova veida “klasiku” – “Raudzeits nav zaudeits” i “Dzeive ar munu babu” (stuosts, kas beja Raibuo Suņa pyrmuo publikaceja 2006. godā), kai ari jaunuokus stuostus. Viereiguoks skaiteituojs var pamaneit, kai atsateistejs, pasamainejs autora stils – nu ironiskuo, druponu īsaspraucūt erotiskajam, leidz sarkastiskajam. Gruomotys izdeviejs – bīdreiba „Kukuži”, vizualuo nūformiejuma autors – Arturs Slaviks. Gruomota izguojuse ar Vaļts Kulturkapitala fonda Latgolys programys atbolstu.

Valentins Lukaševičs „Bolti burti”

Valentina Lukaševiča dzejis kruojums „Bolti burti” izguojs 2011. goda aprelī. Kruojumā īkļauti 103 dzejūli i vizuali i tematiski itys kruojums ir turpynuojums pyrma tam autori izdūtim dzejūļu kruojumim „Kuozynda” (2005) i „Vot taidi vot i batvini” (2006). Kruojumā „Bolti burti” asūšī dzejūli formys ziņā ir saraksteiti postmodernā manīrē, kod eisti nav radzamys rūbežys iz vyds nūpītnuo i satiriskuo, tī ir dzejūli, kuri tīšā nūzeimē i metaforiski viestej na tik par šudiņ nūteikūšū Latgolā, nu apsaver ari globalys gareiga, eksistenciala rakstura problemys. Dzejūļu kruojuma izdeviejs ir „Latgolys Kulturys centra izdevnīceiba”, izdūšonu finansiejs Vaļsts Kulturkapitala fonds.

Vysys „Boņukam 2011” nominātuos gruomotys byus vareiba apsaviert i nūpierkt bīdreibys “Latgolys Studentu centrs” organizātajā latgalīšu gruomotu goldā Rēzeknis Kulturys nomā bolvu padūšonys ceremonejis dīnā 26. februarī nu četru stuņžu piec pušdīnu.