Latvejis Literaturas goda bolvā specialbolva latgalīšu autoram

LaKuGa 28. Marts, 2012. gods Comments Off on Latvejis Literaturas goda bolvā specialbolva latgalīšu autoram
Latvejis Literaturas goda bolvā specialbolva latgalīšu autoram
Latvejis Literaturys goda bolva ir svareiguokais goda nūtykums literaturys nūzarē Latvejā i ekspertu komiseja ir nūsaukuse 16 literari augstvierteiguokūs dorbus 2011. godā četruos nominacejuos.

Bolvys teik daškiertys nominacejuos: Lobuokais dzejis kruojumus, Lobuokais prozys dorbs, Lobuokais tulkuojums latvīšu volūdā i Spylgtuokuo debeja. Ar pylnu nominātūs dorbu sarokstu var īsapazeit ITE.

Eipaši prīceiga viests latgalīšu literaturys atbaļsteituojim ir par latgalīšu dzejnīka Valentina Lukaševiča dzejis kruojuma „Bolti burti” (izdeviejs Latgolys Kulturys centra izdevnīceiba) nomineišonu Latvejis Literaturys goda bolvā 2011.

Bolvu īgivieji kotrā nu četrom nominacejom tiks paziņuoti 26. aprelī 18:00 bolvys padūšonys ceremonejā Reigys muokslys telpā. Taipat pasuocīnī tiks sveikti ari specialbolvu īgivieji i myuža bolvys īgiviejs Latvejis rakstnīceibā rakstnīks Andris Kolbergs.

Latvejis Literaturys goda bolvys 2011 ekspertu komisejā struoduoja Pauls Bankovskis, Lita Silova, Andra Konste, Ronalds Briedis, Anda Baklāne, Guntis Berelis, Liāna Langa, Dace Rukšāne-Ščipčinska.

Eksperti par bolvys daškieršonu Valentina Lukaševiča gruomotai soka:

Pauls Bankovslis atzeist, ka tys naasūt nikaids politkorektuma žests. „Lukaševiča panti ruoda, ka volūda ir tik dzeiva, cik dzeiva gribiešona tū izmontuot – ari dzejā, ari modernā, 21. godu symtam atbylstūšā dzejā.”

Ronalds Briedis – „Koč ari autora eipaši izkūptuos i pīmaklātuos volūdys formys šaļtim kliust par eistynu rebusu skaiteituojim, kam latgalīšu mēle pasveša, i dzejūli koloritā veidā ilustrej pamatā tuos lītuotuojus, lokala rakstura nūzeimeibys krincs teik puorvarāts ar apskaužomu vīglumu i eleganci, līkūt aizadūmuot par kūpeigom vierteibom sevkuram mozuos volūduos dūmuojūšajam.”

Liāna Langa – „Ka gribit dzierdēt laikmeteigu latgalīšu dialekta muzyku, skaitit trešū dzejnīka kruojumu, i jius tiksit na viņ mežūneigi smuordojūšā, saulis izsiļdeitā volūdys pļovā, nu ari variesit sasadzīdeit ar ituos volūdys boguoteibys – dialekta – naatškaideitū i dabyskū madu. Autora dzejuošona ar boltim bortim ir kulturekologoski patriotiska i tuoļredzeiga darbeiba, kas atbolstoma i sumynoma.”

Vaira redzīņu skaiti ite: http://laligaba.lv/index.php/specialbalvas/valentins-lukasevics

Atguodynojam, ka Valentins Lukaševičs Latgalīšu kulturys Goda bolvyā „Boņuks 2011” tyka atzeits ari par lobuokū latgalīšu dzejis autoru 2011. godā.

 

Informacejis olūts: Latvejis Literaturys goda bolva

Komentari slāgti.