Gavieņa laika gareigūs dzīšmu piecpušdīne

LaKuGa 30. Marts, 2012. gods Comments Off on Gavieņa laika gareigūs dzīšmu piecpušdīne
Gavieņa laika gareigūs dzīšmu piecpušdīne
Reitu, 31. martā 13:00 Fr.Trasuna muzejā „Kolnasāta” Rēzeknis nūvodā nūtiks kasgadejais gavieņa laika pasuocīņs – gareigūs dzīšmu piecpušdīne.

Gareigūs dzīšmu piecpušdīne muzejā ir klivuse par stabilu tradiceju i itymā godā byus na viņ sasatikšona ar dzīsmem, bet ari diveju izstuožu atkluošona.

Tai kai regulari dzīšmu piecpušdīnēs teik dzīduotys ari Ontona Matvejāna raksteituos dzīsmis, tod, pasasokūt Ontona Matvejāna dzeivisbīdris Annys duovynuotim materialim, muzejā reitu atkluos Ontonam Matvejām veļteitu pīminis izstuodi, kurymā varēs apsavērt materialus par vysom Matvejāna darbeibys sferom – katehets, dzīšmu autors, školuotuojs, rakstnīks i vēļ i vēļ.

Taipat reitu tiks atkluota ari Pītera Prikuļa savuoktūs materialu izstuode par krysta viesturi i nūzeimi i byus vareiba dzierdēt poša autora stuosteitū par krystu i tuo izceļsmi.

Gavieņa gareigūs dzīšmu piecpušdīnē pīsadaleis folklorys kūpys – Veremu folklorys kūpa „Vuorpa”, Ūzulmuižys folklorys kūpa „Ūzuleni”, Ūzulainis folklorys kūpa „Zeiļa” i Fr.Trasuna muzeja folklorys kūpa „Kolnasāta”. Taipat pīsadaleit sūlejuši ari Cyskadu draudzis bazneickungs Imants Petrovskis i Kaunatys draudzis bazneickungs Haralds Broks.

Komentari slāgti.