Aglyunys nūvods – spāka zeme dvēselei

LaKuGa 10. Apreļs, 2012. gods Comments Off on Aglyunys nūvods – spāka zeme dvēselei
Topuse eiskina “Spāka zeme dvēselei” (Spēka zeme dvēselei) par Aglyunys nūvodu, kas aicynoj i gaida kotru, jo Aglyunys nūvodā ir sovs kruošnums i dobys boguoteibys, kū vārts ir na viņ apsavērt, nu ari izbaudeit, sajust gareiguos, laiceiguos, energetiskuos vierteibys, īraudzeit 63 zylūs azaru spīgeļus, kas atspeid nūvoda dabasūs… Eiskinys taiseišonā miļzeigu īguļdejumu – īrūsmis, finansialū i organizatoriskū – deve Aglyunys nūvoda izjiemiejs Arturs Gražuļs, kurs ar naatlaideigu centeibu i aizrauteigu sajiusmu, pacyluoteibu kūpā ar operatoru Juoni Vydskolnu (Viduskalnu), Aglyunys nūvoda Izjiemiejdarbeibys atbolsta centra vadeituoju Ināru Gražuli i Aglyunys nūvoda dūmis sabīdryskūs attīceibu specialisti Zani Ločmeli daudzys dīnys pavadeja kinys topšonys gaituos. Paleidzeigu rūku, sovu dorba i finansialū īguļdejumu snīdze SIA “Aglyunys Cakuli”. Mijalīnys Cakulis vīsmīleiba kinys dorba grupai daudzus reitus beja kai vierzietojspāks kasdīnys dorbam. Kab kina toptu, dorbā īsasaisteja Aglyunys nūvoda pogostu puorvaļžu, īstuožu vadeituoji, izjiemieji i gostu sātu saiminīki. Kotrs ar prīcu i izjiemeibu beja gotovs paleidzēt, īsasaisteit kinys taiseišonys procesā. Gryba i īcere, kab Aglyunys nūvoda vuords tiktu cyldynuots i cylvākim byutu īspieja ar tū īsapazeit ari videokarteņuos, ir eistynuota i eiskina “Spāka zeme dvēselei” stuosteis kotram par Aglyunu kai unikalu vītu ar boguotu kulturviesturiskū i sakralū montuojumu, naparostu dobu i vīsmīleigim cylvākim, skaistim skotim, amatnīku darbneicom, turisma atpyutys vītom i ari izjiemiejdarbeibys īspiejom. Eiskinys videomateriala apkūpuošona izsuokta 2011. goda vosorā, i niule tei ir pīeimama DVD formatā 4 volūduos – latvīšu, krīvu, angļu i vuocu. Ituo gods suokuos atbolstu eiskinys topšonai snīdze ari Aglyunys nūvoda dūme. Iz prīšku dorbs tiks izmontuots Aglyunys nūvoda reprezentacejis vajadzeibom. Aglyunys nūvoda dūme pasasoka vysim, kuri īsasaisteja eiskinys taiseišonys procesā! Eipašs paļdis izjiemiejam A.Gražuļam! Aglyunys nūvodā ļauds ir puorlīcynuoti – ar lobu grybu, īrūsmi i kūpeigim spākim var padareit daudzi dorbus! . .

Komentari slāgti.