Grupys „Laimas muzykanti” dzīsmei „Sorgeņgeļs” sataiseits video klips

LaKuGa 10. Apreļs, 2012. gods Comments Off on Grupys „Laimas muzykanti” dzīsmei „Sorgeņgeļs” sataiseits video klips
Grupys „Laimas muzykanti” dzīsmei „Sorgeņgeļs” sataiseits video klips
Grupa „Laimas muzykanti” pīduovoj jiusu viereibai jaunuokū grupys dorbu – dzīsmis „Sorgeņgeļs” video klipu.

Klipa fiļmiešona golvonūkuort nūtyka „Laimas muzykantu” koncerttūris laikā Anglejā 2011. goda novembrī, bet gola dorbs padareits Latgolā 2012. goda janvarī. Vīns nu mierkim braucīņam iz Angleju beja izfiļmēt kadrus video klipam, kas tyka dareits kotrā nu mieginuojumim i koncertim breivā šaļtī. Kai atzeist Arturs Uškāns, grupys „Laimas muzykanti” bolsts, – materiala saguoja cīši daudzi, bet klipā izmontuota tyka viņ divpadsmytuo daļa nu vysa.

Dzīsme „Sorgeņgeļs” viereigam klauseituojam ruodeisīs sovaižuoka, nakai īrosts dzierdēt nu „Laimas muzykantu”. Arturs skaidroj: „Leidz šam „Laimas muzykanti” lyka izsvoru iz latgalīšu folkloru, latgalīšu folkroku, koč ari programmuos taipat skaniejušys ari munys autordzīsmis ci instrumentali dorbi („Pi azara”, „Dzāruojeņš”, „Dagda” i c.), bet tuos lelā mārā bejušys tautysdzīšmu stilā i gryuši izškiramys.” Dzīsme „Sorgeņgeļs” suokuos beja raksteita grupys „Patrioti.lg” albumam „Daugaveņa”, bet, Arturam vīnojūtīs ar kolegi (Juri Ostrovski), dzīsme tyka pajimta ari LNT šovā „Dziedošās ģimenes”, kur pīsadaleja ari Uškānu saimis ansamblis, kura sastuovā ir tī poši „Laimas muzykantu” dalinīki. Dzīsme skateituojim i klauseituojim īsapatykuse, tyka sajimts daudzi lobu vuordu i paklauseits īsacejumam īraksteit ari itaidu „Sorgeņgeļa” verseju, kai beja dzieržama šovā.

Arturam tyvs ir pasauļa muzykys (World music) stils, par kuru jis sovulaik ari taiseja raidejumu „Latgolys Radejā” ar nūsaukumu „Spaiti”, i tuo ītekmis dzieržamys ari itymā dzīsmis „Sorgeņgeļs” versejā – skaņ gon afrikaņu džamba, gon īru flauta, gon keltu i britu intonacejis. Kai soka Arturs: „Gols golā senejūs keltu zemēs niule ari struodoj lela daļa myusu izbraukušūs tautīšu. Klips reizē ir ari muna personeiguo suope par sovu tautu, kas vysaidu apstuokļu deļ pamat Latgolu – vīni deļ izdzeivuošonys gryuteibom, cyti – laimis maklādami, cikom Latgola aizaug ar kryumim. „Sorgeņgeļs” ir viestejums gon izbraukušim, gon tim, kas vēļ taisuos braukt paceli.”

Grupai „Laimas muzykanti” paradzāta uzastuošona Leigū vokorā Rēzeknis estradē, kur tiks svieteiti itī latvīšu svātki kūpā ar cytom Latvejis muzykys zvaigznem. Iz Leigū vokora koncertu „Laimas muzykanti” eipaši gaida Latgolys ļauds nu vysa pasauļa, lai kurīs kur ari nabyutu izkleids.

Grupa soka paļdis par atbolstu klipa topšonā Anglejā dzeivojūšim latvīšim Līnītei Zobens-East, Helmutam Feldmanim, Daiņam Kundrātam, Jānai Andersons, kas grupai īruodeja šmukuokuos vītys fiļmiešonai Londonā i Mensfildā, Latgolys pusē – Juoņam Munčam, Daiņam Platačam i vēļ daudzim cytim, kai ari Guntim Kaminskim par klipa fiļmiešonu Latgolā.

Klipa režisors: Arturs Uškāns
Operatori: Matīss Uškāns, Arturs Uškāns, Guntis Kaminskis, atseviški kadri nu http://www.videoblocks.com
Montaža: Guntis Kaminskis i Arturs Uškāns (Gunta Kaminska studejā)

Dzīsmis vuordu i muzykys autors: Arturs Uškāns
Izpiļdeituojs: „Laimas muzykanti” (Uškānu saimis ansamblis)
Dzīsme īraksteita studejā „Meduza Sound” Reigā (skaņu režisors Edgars Skrāģis), studejā „Etnisko skaņu laboratorija” Daugovpilī (skaņu režisors Arturs Uškāns), māstereita studejā „GEM” (Gatis Gaujenieks)


.

Laimas muzykanti – Sorgeņgeļs

.

Komentari slāgti.