Senejī omoti i tolkys Latgolys Kulturviesturis muzejā

Senejī omoti i tolkys Latgolys Kulturviesturis muzejā
Laikā, kod vysā Latvejā gatavejās Leluos Tolkys dīnai, Latgolys Kulturviesturis muzejā (Atbreivuošonys alejā 102, Rēzeknē) nu 10. apreļa da 10. majam jaunuokūs klašu školāni (2.-6. klase), atejūt iz muzejpedagogiskū programu „Tolka Latgolys sātā”, var īpazeit seņuos tolku tradicejis. I Leluo Tolka, i senejuos tolkys ir veids, kai, kūpā struodojūt, īspiejams padareit planavuotūs dorbus.

Itymā godā, suocūt ar 10. apreli, bārnim pyrmū reizi teik pīduovuota interaktiva izgleitojūša kaita „Senejī omoti i dorbi latgalīšu sātā”. Muzeja stuņdē i školāni, i školuotuoji īsajuss improvizātu kruosu, skonu i dorbu rytmā i izzynuos tolkys seņuokū nūzeimi.

Kaita „Senejī omoti i dorbi latgalīšu sātā” sastuov nu 4 daļom. Vīnys nūdarbeibys laikā varēs kaitavuot vīnu kaitys daļu: pavasara, vosorys, rudiņs ci zīmys. Vuiceibu goda laikā ir īspiejams pīsadaleit vysuos četruos daļuos leidza ar godalaiku meju i apgiustamom temom školu vuiceibu programuos.

Nu 10. apreļa da 10. majam školāni ir gaideiti iz pavasara kaitu, majā-junī i septembrī iz vosorys kaitu, oktobrī iz rudiņa kaitu, nu decembrī-janvarī – iz zīmys kaitu.

Školāni, dorbojūtīs grupuos i īsajiutūt kaidā nu lūmom, izzynuos par leluokim doromim dorbim, godskuortu tradicejom, omotim i dorbu veidim, kaidi seņuok beja dzeivojamī i saimisteibys kuormi, kai ari apsavērs muzeja kruojumā asūšūs senejūs dorbareikus i etnografiskūs prīškmatus.

Kaitā izmontuotys muokslinīka Jura Gaigala zeimuotuos kruošņuos tolku i godskuortu svātku ilustracejis. Nūdarbeibys laikā varēs ari izzynuot, kū pots nūvodnīks i fonda „Lāčplēsis” Gūda zeimis eipašnīks stuosta par senejūs tolku nūzeimi.

 

Latgolys Kulturviesturis muzejs aicynoj klasis pīsadaleit kaitys konkursā!

Nūsacejumi: suocūt ar ituo goda apreli da 2013. goda apreļam klasem juopīsadola vysuos 4 kaitys daļuos. Atejūt iz 1. daļu, klase sajims 1. aizdavumu. Kab tū atrysynuotu, atbiļdi varēs īgiut nūdarbeibys laikā. Konkurss nūsaslēgs 2013. goda aprelī, kod veiksmeiguokuo i čakluokuo klase sajims puorsteiguma bolvu.

Kaita „Senejī omoti i dorbi latgalīšu sātā” sataiseita sadarbeibā ar Vaļsts kulturkapitala fondu.

 

Vaira dazynuošonys i īprīškeja dasasaceišona pa teleponu 64622464 (muzejs) ci 26595434 (muzejpedagoge Inese Ločmele).

Moksa par nūdarbeibu – kotram školānam Ls 0,50.

 

Karteņā: Siejis reits, J.Gaigala zeimiejums nu LKM kruojuma


Print Friendly, PDF & Email

Kalenders

Mar
28
Cat
18:30 Izruode “Divejis vyrtuvē, naskai... @ Daugovpiļs teatris
Izruode “Divejis vyrtuvē, naskai... @ Daugovpiļs teatris
Mar 28 @ 18:30 – 20:00
Izruodis pamatā ir ukraiņu dramaturga Aleksandra Mardaņa luga “Muotis i meitys” (“Дочки-матери”), lugu latgaliski tulkuojuse Kristīne Veinšteina. Tei byus gondreiž kriminala komedeja Olega Šapošnikova režejā i viesteis par div liktiņa nalutynuotom sīvītem, kurys par speiti vysim[...]
19:00 Grupys “Galaktika” albuma prezen... @ CATA kulturys noms
Grupys “Galaktika” albuma prezen... @ CATA kulturys noms
Mar 28 @ 19:00 – 21:00
2024. gods zīmā i pavasarī – nu janvara da apreļa – popularuo šlagermuzykys grupa “Galaktika” dūsīs Latvejis koncerttūrē, kurys laikā tiks prezentāts ari jaunais albums “Mums pieder tik daudz”. Koncerti nūtiks gondreiž vysu Latvejis piļsātu[...]