Zynomi titulu “Mis i Misters Vileks nūvods” īgivieji

LaKuGa 24. Apreļs, 2012. gods 487
21. apreļa vokorā Vileks nūvoda Rekovys Kulturys centrā nūvoda īdzeivuotuoji sasatyka, kab izzynuotu, kurīs nu 10 jaunīšu – 5 puišu i 5 mārgu – īgius titulus „Mis i Misters Vileks nūvods”.

Konkursanti svineiguo vokora gaitā ruodieja gon sovys dzīduot, gon doncuot prasmis, nu pyrma tam jau beja paspiejuši apsarunuot ar žureju, stuostūt par sovim mierkim, motivaceju daleibai konkursā i atbiļdūt iz cytim žurejis vaicuojumim.

Konkursantus viertieja i žurejis sastuovā dorbuojās vītejī ļauds: Vileks nūvoda dūmis deputate Sarmīte Šaicāne, Vileks nūvoda kulturys metodike Sandra Ločmele, „Misters Bolvi 2010” Kristiāns Alpe, konkursa „Mis i Misters Latveja 2010” finalists Ivans Jevstigņejevs i kulturys darbinīks, muzikis i producents, festivala „Osvalds” organizātuojs Māris Lāpāns.

Konkursu vadeja pārnuo goda “Mis i Misters Rekova” titulu īgivieji, aktivi i darbeigi nūvoda jaunīši Raimonds Logins, kurs ir ari titula “Misters Bolvi 2011” īgiviejs, i Rūta Cibule, kuruo dorbojās ari folklorys kūpā “Rekavas dzintars”.

Kai pyrmais konkursantu prīšknasums beja folklorys kūpys „Rekavas dzintars” dzīsme „Zīmas vieji”, kas tyka dzīduota kūpā ar folklorys kūpys dalinīku Vili Cibuli. Turpynuojumā konkursa dalinīki doncuoja i Latgolys daņci, i disko i rumbu, nu eipašys skateituoju simpatejis izapeļnieja puišu dvīļu daņcs i mārgu country stila izguojīņs.

Vokora gaitā izastuoja ari eipaši gosti – LNT šova „Dzīdūšuos saimis” uzvarātuoji – Puncuļu saime, kas prīcieja saguojušūs gon ar šova laikā īmeiļuotom melodejom, gon mozuok zynomom. Naiztryukstūši izskanieja ari latgaliskuos „Dzeiveite” i „Skaidruo volūda”.

Par konkursa titulu īgiviejim kliva: Skateituoju simpateju bolvys kai piec škārsteikla, tai zalā asūšūs skateituoju bolsuojumim īgive, taipat par Vice Mis i Misters titulu eipašnīkim kliva Aiga Slišāne i Raivis Dauksts, nu par Vileks nūvoda Mis i Misters titula īgiviejim tyka atzeiti Janita Ivanova nu Vileks i Arnolds Skangalis nu Upeitis.

Konkursa organizātuoji i poši jaunīši beja cīši prīceigi par padareitū i kūpeigi pavadeitū laiku, taipat i skateituojus daudzi konkursa dalinīki puorsteidze ar sovu izadrūšynuošonu pīsadaleit i lobū rezultatu.

 

Komentari slāgti.