Koncertprograma, kas pārnuo goda beiguos pyrmatskaņuota jaunuos muzykys festivalā „Arēna” ir stuosts par cylvāku, kas dzīž, i programys tapšonai ir eipaša viesture. Tei aizasuoka 2008. godā, kod dirigents Sigvards Kļava ar režisoru Uģi Brikmani devēs ekspedicejā iz katuoļu dzīduojumu centrim Kūrzemē, Latgolā, Zemgalē i Vydzemē, kur gasteja leluokuos i mozuokuos bazneicuos, kūpā ar maja dzīduojumu pratiejim pīstuoja pi jaunim i godu symtim vacim krystim – saklausieja gon kūpdzīduošonys vīnojūšū spāku, gon cīšu personiskus stuostus vīna cylvāka sarunā ar Vysuaugstuokū.

Koncerta pragrama, kas topuse īsadvesmojūt nu ekspedicejis laikā izdareitim īrokstim, izskanēs četru komponistu saraksteitūs oposūs – Ērika Ešenvalda Dabasu Litaneja, Jēkaba Nīmaņa Izklausi, Muote, Valta Pūcis Sajiuta. Sirds. Dabasi. i Ģirta Biša Reitadzīsnai dagūšī vuordi, kuru partituruos sasaveis katuoļu dzīduojumi nu vysys Latvejis.

Kai stuosa dirigents Sigvards Kļava: „Nu īcarātuo saguojs piļneigi kas cyts, kas naatgrīzeniski mainejs poša vierteibu skolu. Atrodom nagaideitu viersvierteibu – na dzīsmis, bet Dzīduojumus ar lelū burtu. Satykom dzīdūšus ļauds, kurī atkluoja dzīduošonys fenomenu pavysam cytā veidā. Da itam nabeju aizadūmuojs, ka vīnu i tū pošu dzīsmi cylvāki ar dažaidim dzeivisstuostim izdzīž piļneibā atškireigi, ar tū dzīduošonys pīredzi, kaida jim bejuse pyrma tam. Saprotom, ka paraleli tradicionalajai latvīšu dzīduošonai i kuoru kulturai pastuov vēļ vīns cīši spieceigys kulturys emocionalais viestejums, kas tū padora atškireigu. Maņ beja svareigi dzierdēt, kū cylvāks dzīž uorpus īrostuos sakraluos vidis, bazneicys sīnom. Kū babeņa dzīž, nūguojuse tuoli nu sovys sātys pi senejuo krysta mežā, varbyut lelā leitā, nalaikā. Kū babeņa dzīž, guļūt iz gultys ci tod, kod jei vaira spiej aizruopuot viņ da plitai, kū dzīž, kod jai nivīns nu molys nalīk dzīduot, nu īškejuos, gareiguos vajadzeibys deļ. Juoparuoda miļzeigs gūds gon itim cylvākim, gon aizīmūšai kulturai. Tāņ saprūtu, ka asam pasakuopuši iz lela, gareigi pīpiļdeita pakuopīna, nu itei sakne ir cīši vuoreiga, i varbyut tyvojās lels pūstums. Ite nav īspiejis koč kū „gluobt”, jo tu navari likt suokt dzīduot Tam Kungam, taipat kai likt pīsavērst ticeibai.”

Koncerta klauseituojim byus vareiba redzēt Uģa Brikmaņa, Sigvarda Kļavys i Mārtiņa Brauna taiseitū 20 minotu videostuostu, kas aizvess klauseituojus pa ekspedicejis celim, paruodūt plašū katuoļu dzīduojumu skanejumu spektru nu pyrmolūta.

Koncertus organizej VSIA “Latvijas koncerti”. Koncertus finansiali atbolsta Kulturys ministreja, Latgolys Planavuošonys regions, Vaļsts Kulturkapitala fonds, Vileks nūvoda dūme, Viļānu nūvoda dūme i Rēzeknis piļsātys dūme.

Koncerti:

18. majā 18:00 Vileks Jezus Sirds Rūmys katuoļu bazneicā

19. majā 12:00 Viļānūs Sv. Erceņgeļa Mikeļa Rūmys katuoļu bazneicā

19. majā 19:00 Rēzeknē Jezus Sirds katedralē