Muzykys školu festivalā pīsadaeja: Baļtinovys Muzykys i muokslys škola, Bolvu Muzykys škola, Gulbenis Muzykys škola, Kuorsovys Muzykys i muokslys škola, Ludzys Muzykys škola, Maltys Muzykys škola, Juoņa Ivanova Rēzeknis Muzykys vydsškola, Varakļuonu Muzykys i muokslys škola, Vileks Muzykys i muokslys škola, Zilupis Muzykys i muokslys škola.

Festivala laikā nūtyka vairuoki koncerti – gareiguos muzykys Vileks Rūmys katuoļu bazneicā i Lelūs kolektivu koncerts Žīguru Kulturys nomā.

Gareiguos muzykys koncertu atkluoja Vileks Muzykys i muokslys školys audziekne Anda Sergejeva, apsveikuma vuordus saceja Tāvs Jezups Kornaševskis. Koncerta turpynuojumā izskanēja Juoņa Ivanova Rēzeknis muzykys vydsškolys audziekņa izpiļdeituo Sandrys Mežoris dzīsme „Lyugums” ar Leontinis Apšineicys vuordim. Koncertā beja dzieržami ari populari gareiguos muzykys skonu dorbi, kurūs izpiļdeja solisti, flautu, saksofonu, akordeonu, vijūļu i metalpyušamūs instrumentu ansambli. Koncertu vadeja Inita Raginska.

Lelūs kolektivu koncerta apsveikuma runu saceja Vileks nūvoda dūmis prīšksādātuojs Sergejs Maksimovs. Pasuocīņa laikā vadeituojis raiseja sarunu ar skateituojim i dalinīkim par muzykys pasauļs nūzeimeigom lītom. Vīna piec ūtrys skonu sātu pīpīldeja notu zeimis, i ar kotru nu tom saistejuos kaidys školys vuords. Koncerta suokuos skanēja nūvodneicys Sandrys Mežoris kuozu dzīšmu cikls „Ogūrču mērcēšona”, „Viļteiguo koza”, „Vosorys kuozys” i „Sīnakozys kuozys”, kū izpiļdeja apvīnuotī muzykys školu kuori. Piečuok izastuoja Vileks Muzykys i muoksys školys folklorys kapela (školuotuoji Svetlane Krasnokutska, Ilona Bukšā i Zita Barkāne) i saksofonistu ansamblis (školuotuojs Aldis Prancāns). Koncertu kuplynuoja vijūlnīku, akordeonistu ansambli i estradis ansamblis ar solisti Valēriju Satibaldijevu nu Ludzys, kai ari Kuorsovys doncuotuojis. Koncertu nūslēdze Bolvu pyutieju orkestra izastuošona. Pasuocīņa režisore i vadeituoja beja Ineta Lindenberga, nu koncertu vadeit paleidzēja Elīna Zaķe.

Leidza ar festivalu nūsaslēdze lels aplis ari Zīmeļlatgolys muzykys školu dzeivē. Itaids festivals ir unikals ar tū, ka rodīs itepat Latgolā i leidzeigs nanūteik nikur cytur Latvejā, par kū pateiceiba festivala idejis autoram Bolvu muzykys školys direktoram Egonam Salmanim.

Jaunu sasatikšonys vītu piec goda nūsaceja izlūzis kuorteibā i laimeiguo lūze tyka Varakļuonu Muzykys i muokslys vydsškolai, kur tod ari nūtiks jau XII Zīmeļlatgolys muzykys školu festivals.