23. junī 20:00 Rēzkeknis Kulturys i atpyutys parka byus dyzāns Leigū svātku lelkoncerts, kuryma atguojušūs prīcēs vaira kai 100 dalinīku – dzīduotuoju, doncuotuoju i akteru.

Koncerta pyrmā daļā muokslenīki izpiļdeis sovys meiluokuos dzīsmis i popularuokūs hitus, nu koncerta ūtrā daļā gaidoma sasadzīduošona ar kuori, solistim i publiku, vysi kūpā izdzīduos tautysdzīsmis, ziņgis, kino i estradis dzīsmis dirigenta Inta Teterovska viervadeibā.

Leigū svātkūs Rēzeknē izastuos Jolanda Suvorova, Inga i Normunds, Olga Dreģe, Dzintars Čīča, Kaspars Antess, Latgolys dāmu pops, Jenny May, Borowa Mc, Roberts Pētersons, Mirdza Martinsone, muosys Legzdiņas, Laimas Muzykanti, Dziga, Patrioti.lg i daudzi, daudzi cyti muokslenīki. Koncertu vadeis Valters Krauze.

Leiguot grybātuojus prīcēs ari latgalīšu dzīdūšuos saimis – Eriņi, Igauņi, Puncuļi i Uškāni. Koncerts byus cīši dažaids i kotra atrass koč kū sovai muzykalajai gaumei. Izreizis piec lelkoncerta 23:00 suoksīs ļusteigais Leigū nakts zaļumbals.

Koncerta dīnā Rēzeknis Kulturys i atpyutys parkā leiguotuoji tiks gaideiti nu 19:00, kab varātu ījimt lobuokuos vītys. Taipat byus vareiba baudeit dažaidus iedīņus, Juoņu sīru i Latvejis lobuokūs ols dareitovu olu.

Pyrmī 1000 bileti moksoj 3,00 Ls, piečuok 4,00 Ls, nu koncerta dīnā 5,00 Ls. Biletus var nūpierkt Rēzeknis Kulturys centrā i „Biletu paradizis” kasēs. Bārnim da 10 godu vacuma kai ari Juonim i Līgom īeja byus bez moksys – viņ juoparuoda personu aplīcynūši dokumenti.