Izsludynuots Ontona Slišāna pīminekļa skicis izstruodis konkurss

Izsludynuots Ontona Slišāna pīminekļa skicis izstruodis konkurss

Upeitis kulturviesturis muzejs izsludynoj konkursu par Ontona Slišāna pīminekļa skicis izstruodi.

2010. goda 15. decembrī myužeibā nūguoja Latgolys dzejnīks, rakstnīks, publicists, folklorys vuociejs i pietnīks, Valsts Kulturkapitala fonda (VKKF) myuža stipendiats Ontons (Antons) Slišāns (28.12.1948. – 15.12.2010.).

Ontons sovā myužā beja padariejs cīši daudz, jau suocūtnu 20. godu symta septeņdesmitajim godim vuocs i pīrakstiejs Zīmeļlatgolys folkloru, īskaņuojs gon tautysdzīsmis, gon saļmu dzīduojumus. 1980. godā dybynuojs i vadejs Upeitis i Rekovys etnografiskūs ansambļus. Nu 20. godu symta sešdesmitajim godim suoca raksteit dzeju. O.Slišāna ailis ir skaitomys 30 izdūtajuos gruomotuos. Jis beja vīneigais dzejnīks Latvejā, kas raksteja i izdeve dzejis gruomotys bārnim latgalīšu volūdā. Sataisiejs i vadiejs Upeitis kulturyviesturis muzeju. Dybynuojs i īdzeivynuojs pasaulī vacuokū latgalīšu meilys dzīšmu i dzejis festivalu „Upītes Uobeļduorzs”. Tai vēļ varātu izskaiteit daudzi i daudzi juo padareitūs dorbus latgalīšu namaterialuos kulturys vuokšonā, saglobuošonā i populariziešonā.

Kab napagaistu Ontona Slišāna pīmiņa, Upeitis kulturviesturis muzejs izsludynoj konkursu: „Ontona Slišāna pīminekļa skicis izstruode”, kurymā teik aicynuots pīsadaleit sevkurs īdzeivuotuojs, kuram ir ideja, kaidam vādzātu byut O.Slišāna pīminekļam, izstruodojūt skici treis dimenseju izskotā i īsnīdzūt Upeitis kulturviesturis muzejam laikā nu ituo goda 14. maja da 30. novembram. Lobuokuos idejis autors tiks apbolvuots i skice tiks izmontuota pīminekļa sataiseišonai.

Vaira dazynuošonys – viertīs nūlykumā.

Upeitis kulturviesturis muzeja vadeituoja Ligita Spridzāne

 

Karteņā Ontons Slišāns – foto Juris Zariņš
Ontona Slišāna pīminekļa skiču konkurss – NŪLYKUMS