Nabeja damiersti ari vysi “Olūteņa” vadeituoji – Irēna Ļeonova, Valentīna Jaseviča, Jānis Teilāns, Ivars Livdāns, Māra Kandranicka, Ilze Mežiniece – kuri eistuoku ci garuoku laika šaļti ir guojuši vīnā sūlī ar dzīduotuojom.

Sveikt “Olūteņu” beja sabraukuši daudzi gostu, gondreiž kotrs beja atguojs jimūt leidza na viņ duovonu i lelu puču kliepi, nu ari skaneigu dzīsmu. “Olūteņu” sveice folklorys kūpa “Olūteņi” nu Dagdys, folklorys kūpa nu Rušuonys, folklorys kūpa nu Izvaltys “Mozī latgalīši”, Aglyunys KC popgrupa “M.A.L.A.”, Aglyunys nūvoda jauktais vokalais ansamblis, Aglyunys KC sīvīšu vokalais ansamblis. Pasuocīņa laikā natryuka jūku i kūpdzīšmu. Zeimeigi, ka itūreiz kūpā ari tim, kuri izastuoja iz skotuvis, dzīduoja ari zalā asūšī. Ari jubilari beja deveigi i gostim snīdze cīnastu – maizis klaipus. Piec garuo koncerta, kai saceja poši svinātuoji, vyss tik suocās – gaviļnīki i gosti piecpušdīnu pavadeja ļusteiguos dzīsmēs i dančūs Aglyunys kulturys centra pogolmā.

Viesturiska īsavieršona folklorys kūpys topšonā:

Folklorys kūpys “Olūteņš” aizsuokumi meklejami tuolajā 1957. godā. Pyrmais izvadums “Sasaderinuošona”, ar kurū kūpa izastuoja Reigā, tyka īraksteits ari radejā. Kūpys dybynuotuojs i ilggadejs vadeituojs beja Aleksandrs Vasiļevskis. 1958. goda 13. decembrī folklorys kūpa sajiusminuoja skateituojus Latgolys kulturys nedeļā Reigā, izvadumā “Pīguļā” pīsadaleja 42 dalinīki. Izvadumu paleidzieja sagataveit Lūcija Baumane, nu piečuok ari režisore Manga Tetere. Folklorys kūpys muziciešonys suokys beja gona smogys – nabeja plašu telpu mieginuojumim, kluba ustoba beja moza, vokorūs nūtyka kinu seansi, nu vītejais HES padeve gaismu tik da pusnaktej. Beja laiki, kod nadreikstieja leiguot, folklora beja aizlīgta, nu ansamblis dzīduoja vysod i vysur, kur viņ beja vareiba – kuozuos, bērēs, krystobuos i tolkuos… Nu dzīduotgryba i mīlesteiba iz tautysdzīsmi sasaglobuojuse cauri godim!