„ALMUS” dīna Škilbanūs

„ALMUS” dīna Škilbanūs

Piec garuokys klusiešonys striečis Drycanu gareigūs dzīšmu ansambļa „Almus” meitinis laide vaļā byzuošonys šaļti. Koncertiešonys regularitate propuluse, vītejuo aktivitate iz nullis, transporta sarežgeituoka dabuošona – taidys beja pādejuo laika ansambļa aktualitatis. Bet devīze „Napalīc vaca!” beja spākā i marta prīškpādejā sastdinē – Drycanu i Strūžanu pamalēs beja jiutama mierktīceiga kusteiba. Kod šopereits Eduards buobu vazumu beja saštopies buseņā, tod izaruodeja, ka iz Bolvu pusi bez dzīduotuojom nasās ari ansambļa seniore A. Matvejāne, fotografe Siļva i brangs kringeļs. Vēļ Bykovā ar vargaņu „rūkom i kuojom” tyka salaseita varganiste Inta i buss pliese tuoļuok iz Latgolys zīmeļdali.

Ceļā tyka teisteits atmiņu komuļs par īprīškejūs izbraucīņu tematiku, kod „Almus” vadieja Maestro Ontons Matvejāns i tyka atzeits, ka īseiksteit navar i koncertdarbeiba i ilgstūšuo draudzeiba ir juoturpynoj. Buseņš pīstuoja pi jaunuos prāvesta I. Babra vadeibā izcaltuos Škilbanu bazneicys i atbrauciejis syltai sveice sagaideituoju komanda ar varganisti Anastasiju Ločmeli i Ainu Slišāni prīškgolā. A bazneica naseņ pasvieteita, gaiša, skaista, teira, pi sastdinis dīnys teiri labi apmaklāta. Goreigūs dzīšmu koncertā dzīduoja Škilbanu kuora gon senioru, gon junioru sastuovs, ari „Almus” turieja O.Matvejāna kanti i naatpalyka skaniejumā nu škilbanīšim. Gaškom beja tys gūds dzīduot Sv.Mišu, kuru celebrieja naseņ draudzē īcaltais prāvests I.Vigulis, kurs ari demonstrieja teiri voi operetiskys plaša spektra bolsa īspiejis. Kai zakristijans pīkolpuoja nivīns cyts kai Vileks nūvoda pašvaļdeibys vadeituojs S. Maksimovs… Melodejis i lyugšonu burveibu deve izbaudiet bazneicys izcyluo akustika, kas ari na vysod jaunajuos bazneicuos ir sateikama. Piec pādejuos dzīsmis akordim „Almus” dāmys tyka aicynuotys bazneicys pībyuvē, kur telpys apdzeivoj svātdinis škola, religiskuos literaturys biblioteka, ari atpyutys styureits. Īeimūt nu uorīnis teic taiduos kai izstuodis sinceitēs, kuruos puordūmuoti izlykti liturgiskī prīkšmati ar paskaidruojumim nu vacuos bazneicys. Tys otkon īprīškejuo prāvesta S. Ivanova nūpalns. Ak, bolta skaudeiba īgula gašku sirdīs, itūs vysus lobumus verūtīs i pi čaja kruškys muojinīku sasnāgumus kvālejūt.

Ar tū vieļ gasteišonuos nasabeidze. Buss paripinieja drusku atpakaļ i nūstuoja pi atjaunuotuo Škilbanu kulturys centra. ES naudeņa īlykta lītdereigi – otkon myusus vyss sagaidieja jauns, sprišs, gaišs – oi, jau i dzaltona skaudeiba suoce mestīs! „Almus” izbraukumbrigade tyka atsādynuota gūda vītā i škilbanīši otkon dzīduoja tikai gostim. Kai pyrmīs ruove vaļā jauktīs kuors, a piec tuo seviški sprigonai  folklorys kūpa „Rekavas dzintars” .

Folkloristi ari paduovynuoja kotram gostam sovu pyrmū CD ar nūsaukumu „Iz vacuo okys sukruma” . Myusu pusē tū sukrumu sauktu par syrūbu. A tuoļuok beja „gaveišona” pi garšeigu ruletu (kai nu Rogovkys!), pošcaptys upiņmaizis i vysaidu cytaidu „prištyku” golda. Tyka sarunuota nuokušuo sasaskrīšona. Itū reizi škilbanīši gostūs brauks iz Drycanim jau 20.majā.

Atpakaļ liduoja buss kai viejputnis  i emocionalā pīpacālumā tam leidza grīzēs braucieju dvieselis. Pīpacaltys, nūvierteitys, ar jaunu energejis davu „Almus” meitinis otkon gotovys jaunim varūņdorbim!

Itū vysu redzieja, leidza prīcuojuos i jiusim pastuostieja
fotografeituoja Silvija