Izstuodis atkluošonā paradzāta ari sasatikšona ar pošu kinurežisoru, scenaristu, akteri i muokslenīku Juoni Streiču.

LaKuGa jau ir rakstejuse par ituos ceļojūšuos izstuodis atkluošonys reizem Rēzeknē i Daugovpilī. Vaira skaitit ITE. Atguodynuosim tik, ka Streičs par muokslenīku gribiejs kliut jau bierneibā, Rēzeknis pedagogiskuos školys zeimuošonys prīškmata metodikys pasnīdziejs Jakovs Beketovs jam atkluojis pyrmūs orūda nūslāpumus i mudynuojs vuiceitīs tuoļuok, nu aizaraušona ar teatri beja stypruoka i aizvede muokslenīku iz kino. Nu prasme zeimuot, Streičam atvīgluoja dīnastu armejā. Studenta godūs jis ar tū peļneja iztyku, gatavejūt dekoracejis amatīrteatrūs, taisūt plakatus klubim i izjāmumim. Ari kino muokslā tys cīši nūdereja i Streiča kinu vizualais ītārps ir puorsvorā juo diktāts i vadeits. 1970. godā kinostudejis muokslinīka asistents Juoņs Anmaņs, īraudzejs Streiča aizaraušonu, vasalus 30 godus nalyka mīrā, leidz Juoņs atsuoka gleznuošonu i nu jau desmit godus Streičs pīsadola izstuodēs i plenerūs kūpā ar nūpītnim muokslinīkim, sovim draugim.

Sasatikšonys reizē ar Juoni Streiču paradzāts nūsavērt ari 2004. godā dabeigtū kinu „Rudiņa rūzis”, kurymā pīsadola taidi akteri kai Maija Doveika, Juris Žagars, Varis Vētra, Baiba Kranāte, Akvelīna Līvmane, Romualds Ancāns. Kina izjimta piec Elīnys Zuoleitis lugys motivim i viestej par nagaideitu sasatikšonu, lauleibys škieršonu i, prūtama līta, mīlesteibu i izškireigim lāmumim.