26. majā Rēzeknē tyka atlaseiti konkursa „Mis i Misters Rēzekne 2012” dalinīki. Nu vysim grybātuojim žureja izavielieja desmit jaunīšus, kas divejus mienešus gataviesīs konkursa finalam, kurs byus Rēzeknis piļsātys svātku laikā 2012. goda 3. augustā 18:00 Rēzeknis kulturys nomā.

Žurejis sastuovā iz dalinīku atlasi beja: : Inta Fogele – Agenturyss ‘’Mis Latveja’’ direktore; Agrita Grosbarte- puormaiņu i puorvierteibu trenere, pedagoge, psihologe, šmukuma eksperte; Deniss Tumakovs – profesionals doncuotuojs, konkursa horeografs i režisors; Uldis Vilks – konkursa oficialais fotografs , studejis ‘’Wolfstudio’’ vadeituojs; Sandija Sarkane – tāla dizainere, stila konsultante; Svetlana Vasina – skaistumkūpšonys salona ”ISA’’ vadeituoja; Edīte Melehova – marketinga projektu vadeituoja; Oksana Kardanece – SPA sejis estetike;  Jānis Beķeris – Misters Foto konkursā ‘’Mis i Misters Latveja 2010’’; Edgars Blinovs – Misters Rēzekne 2004, kinys „Latgolys laikadečs” režisors; Ēriks Linkuns – konkursa tehniskais direktors i Kristīne Viļuma – konkursa ‘’Mis i Misters Rēzekne 2012’’ golvonuo organizatore i idejis autore.

Pasasokūt Intys Fogelis pamudynuojumam i Kristīnis Viļumys izjiemeiba itūgod atdzimst konkurss „Mis i Misters Rēzekne”. Kristīne jau daudzi godu struodoj mūdis sferā, vodūt sovu izjāmumu, kai ari sasteibā ar mūdis industreju, jau ilgu laiku pīsadola daudzi projektūs kai fotomodele, ir konkursa „E-Miss Latveja 2011” izvarātuoja kai ari puorstuoviejuse i nasuse Latvejis vuordu tuoļuok pasaulī starptautiskajā skaistuma konkursā Malaizejā ‘’Miss Tourism Internatinal  World Final 2011’’.

Taipat dorba grupā stuodoj styprs sastuovs, kas dora cīši atbiļdeigu dorbu konkursa rekuošonā. Tuos sastuovā: Arnis Teivāns, Dmitrijs Suvorovs, Elīna Fjodorova, Aleksandrs Fedotovs, kai ari Rēzeknis piļsātys jaunīšu dūme ( Mārtiņs Strods, Alvis Berngards, Reinis Komuls, Ilze Burceva, Ervīns Arbidāns i cyti).

10 izvālātī dalinīki konkursa finalam ir:

Ivans Smirnovs – 18 godi, vuicuos Rēzeknis 6. vysdškolā. Iz konkursu atguoja, kab puorbaudeitu sovu variešonu. Pateik daudzi sportuot, maut, spēlēt šaha i par sovu leluokū karsmi izskota futbola frīstailu.

Rihards Zeiļa – 19 godi, studej BA ‘’Turība’’ Tīseibu zynuotnis. Gryb puorbaudeit sovu variešonu osā konkurencē. Izskota sevi par atvārtu, draudzeigu cylvāku, kurs dreiži dasamāroj kotrai situacejai.

Artūrs Voskāns – 18 godi, vuicuos Rēzeknis 5. vydsškolā. Iz konkursu atguoja puorbaudeit koč kuo jauna i varbyut ari izvarēt. Pīsadola kusteiba „Jaunsardze” i sovu dzeivi gryb saisteit ar militarū karjeru. Raksturoj sevi kai gūda i vuorda cylvāku.

Artis Salinieks – 23 godi, Rēzeknis Augstsškolys students. Vīns nu mierkim, deļkuo jis atguoja iz konkursu ir puorvarēt baili izastuot publikys prīškā. Vuicuos norvegīšu volūdu i breivā laikā pateik sportuot.

Juoņs Freibergs – 18 godi, vuicuos Rēzeknis Vaļsts gimnazejā, 11. klasē. Pīzeist, ka konkurss ir loba pīredze na viņ puorbaudeit, nu sevi ari paruodeit. Nūsadorboj ar svorceļšonu i iz prīšku planavoj tū dareit vēļ profesionaluoka leiminī.

Laima Studente – 19 godi, studej Rēzeknis Augstškolā. Konkursa laikā gryb paruodeit i pylnveiduot sevi. Laimai ir ceņteibys i atbiļdeibys sajiuta par lītom, kuruos dora, kai ari jei atzeist, ka pi pyrmuos naveiksmis nikod napasadūd.

Liliana Garkalane – 19 godi, vuicuos 12. klasē. Izskota sevi par emocionalu i atbiļdeigu cylvāku. Interesejāš par politologejis zynuotni, aktivi pīsadola dažaidūs konkursūs, saceņseibuos. pateik ceļuot i breivajā laikā sportuot.

Evija Priževoite – 18 godi, vuicuos Rēzeknis 5. vydsškolā, 11. klasē. Izskota sevi par ļusteigu, atraktivu i komunikablu mārgu, kurai pateik īsapazeit ar jaunim cylvākim i pījimt dažaidus dzeivis izaicynuojumus. Cīši pateik mūdis industreja.

Evelīna Šaulīte – 19 godi, vuicuos Austrumlatgolys profesionalajā  vydsškolā  – mozumtierdznīceibys komerczineibys. Izskota sevi par dabisku i daudzpuseigu mārgu. Treis vuordi, kas jū vysu vaira raksturoj ir mierktīceiba, spieja izadreikstēt i patīseigums. Atzeist, ka mierkis, ar kurū atguoja pīsadaleit konkursā, ir izvora.

Santa Seržante – 19 godi, vuicuos Rēzeknis Vaļsts gimnazejā, 12. klasē. Aizaraušonys ir sports, doncuošona, muoksla i muzyka. Izskota sevi par aktivu mārgu, kurai pateik pījimt jaunus izaicynuojums, izstuodeit sev augšus mierčus i vysod tūs ari sasnīgt.

Itūs diveju mienešu laikā da konkursa finalam dalinīkim byus daudzi juostruodoj i juopīsadola dažaidūs pasuocīņūs, bet skateituojus finalā gaideis breineigs pasuocīņs, kuru vadeis dzīduotuojs Lauris Reiniks.

Taipat konkursa finalā dalinīki ruodeis ari sovus talantus, kai ari pīsadaleis dzīduotuojs Roberto Meloni i cyti Latvejā zynomi muokslenīki  i doncuotuoji.

Jiusu viereibai ari dalinīku pyrmuos fotosesejis rezultats. Par grimu i motu sakuortuojumu pasaryupieja salona „ISA” specialisti – frizīris Vita Laizāne i Svetlana Vasina, vizažiste Jūlija Kirillanova.