Ambeļu pogostā nūtiks amatīrteatru saīts

Ambeļu pogostā nūtiks amatīrteatru saīts

Nu 16. leidz 17. juņam Daugovpiļs nūvoda Ambeļu pogostā nūtiks Storptautyskais amatīrteatru saīts „Spielejam kūpā”. Saītā pīsadaleis Daugovpiļs nūvoda amatīrteatri, naatkareigais teatris „Jaunais teatris” i Zarasu kulturys centra bārnu teatra studeja. Byus ari zaļumbals i teatra sporta turnirs.

Daugovpiļs nūvoda amatīrteatru saīts nūteik reizi divejūs godūs, ari itūgod jis ir īgivs storptautysku skaniejumu. Pasasokūt Eiropys sābru attīceibu i partnereibys instrumenta Latvejis, Lītovys i Boltkrīvejis puorrūbežu sadarbeibys projektam „The Joy of Mobility”, Ambeļūs atbrauks gostūs Zarasu kulturys centra bārnu teatra studeja ar muzykalom miniaturom.

Īpašs nūtykums byus Naatkareiguo teatra „Jaunais teatris” izruode „Kolekcionars” –  kriminalkomedeja piec Dž. Faulza romana „Kolekcionars” motivim. Lūmuos: Juoņs Jarāns, Jūleja Ļaha, režisors: Ivars Lūsis.
„Kolekcionars” ir stuosts par palāku, nacylu īriedneiti, kam kliepī īkreit nacarāta veiksme. Jis vinnej totalizatorā miļzeigu naudys summu, kas ļaun jam realizēt dzeivē sovus slāptuokūs sapynus. Teik puorkuopti vysi moralis i etikys rūbeži. Tys ir suopeigs mīlesteibys stuosts, osu izjiutu cīneituojim – par vojuotuoja īkuori, vieļmem i fantazejom. Izruode nav dūmuota bārnim jaunuokim par 14 godim.

16. juņa vokorā vysi teik aicynuoti iz zaļumbalu. Muzicēs nivīnam nazynoma grupa „Flokši” ar plaši pazeistamim muzykantim – Ingu Zeili i Arturu Uškānu.

Ituo goda saīts „Spielejam kūpā” byus naparosts, partū ka Daugovpiļs nūvoda amatīrteatru daleibnīki teik aicynuoti pīsadaleit meistarklasēs. Aktīrmeistareibu pasnīgs režisors Ivars Lūsis, skotuvis kusteibu – kusteibu konsultante Rita Grīnfelde, teatra sportu – teatra pedagoge Ligita Smildzeņa. Meistarklašu gola rezultatu varēs redzēt teatra sporta turnirā.

Izruodēs, zaļumbalā i teatra sporta turnirā īeja bez moksys!

Programa

16. juņs
21:00 — Naatkareiguo teatra „Jaunais teatris” izruode „Kolekcionars” — kriminalkomedeja piec Dž. Faulza romana „Kolekcionars” motivim.
Lūmuos: Juoņs Jarāns i Jūleja Ļaha, režisors Ivars Lūsis
23:00 — zaļumbals

17. juņs
11:00 — Zarasu kulturys centra bārnu teatra studejis muzykaluos miniaturys „Rogonys duorglītys”, „Plyudi sātā”, „Priņcs”
12:30 — Raiņa sātys Berkenelē teatra studejis „Komuleits”  („Kamolītis”) literara kompoziceja „Persikys” piec Raiņa novelis „Persikys” motivim
13:30 — Teatra sporta turnirs, saīta nūslāgums (pīsadola Daugovpiļs nūvoda amatīrteatru aktīru komandys)

Izruodis ir daļa nu Eiropys sābru attīceibu i partnereibys instrumenta Latvejis, Lītovys i Boltkrīvejis puorrūbežu sadarbeibys projekta „The Joy of Mobility” LLB – 1 – 063

Informaceju sagatavuoja Anita Auzāne, Daugovpiļs nūvoda Kulturys centra kulturys menedžere

Print Friendly, PDF & Email

Komentari

Kalenders

Mar
28
Cat
18:30 Izruode “Divejis vyrtuvē, naskai... @ Daugovpiļs teatris
Izruode “Divejis vyrtuvē, naskai... @ Daugovpiļs teatris
Mar 28 @ 18:30 – 20:00
Izruodis pamatā ir ukraiņu dramaturga Aleksandra Mardaņa luga “Muotis i meitys” (“Дочки-матери”), lugu latgaliski tulkuojuse Kristīne Veinšteina. Tei byus gondreiž kriminala komedeja Olega Šapošnikova režejā i viesteis par div liktiņa nalutynuotom sīvītem, kurys par speiti vysim[...]
19:00 Grupys “Galaktika” albuma prezen... @ CATA kulturys noms
Grupys “Galaktika” albuma prezen... @ CATA kulturys noms
Mar 28 @ 19:00 – 21:00
2024. gods zīmā i pavasarī – nu janvara da apreļa – popularuo šlagermuzykys grupa “Galaktika” dūsīs Latvejis koncerttūrē, kurys laikā tiks prezentāts ari jaunais albums “Mums pieder tik daudz”. Koncerti nūtiks gondreiž vysu Latvejis piļsātu[...]