Cik latgalīšu volūdys lītuotuoju ir Latvejā? Tautys skaiteišonys dati

Cik latgalīšu volūdys lītuotuoju ir Latvejā? Tautys skaiteišonys dati
2011. goda Tautys skaiteišonā pyrmū reizi tyka izdūts vaicuojums par latgalīšu volūdys lītuošonu īdzeivuotuoju vydā. Dati ilgi i ar napacīteibu gaideiti i niu dalieji teik pīduovuoti ari jiusu viereibai. Publiski pīeimami Centraluos statistikys puorvaļdis sātyslopā byušūt atrūnomi jaunnedeļ.

Piec Latvejis Republikys Centraluos statistikys puorvaļdis 2011. goda Tautys skaiteišonys datim Latvejā iz vaicuojumu „Voi Jius kasdīnā lītojat latvīšu volūdys paveidu – latgalīšu volūdu?” apstiprynūši atbiļdieja 164 510 cylvāku, nu kurim 73 835 ir zāni, puiškini i veiri, bet 90 675 meitinis, mārgys i sīvys. Jamūt vārā Latvejis īdzeivuotuoju skaitu, saīt, ka latgalīšu volūdu lītoj napylni 8 % Latvejā Tautys skaiteišonā registrātūs īdzeivuotuoju.

Šudiņ LaKuGā pīduovojom dažaida veida informativys tabulys i grafikus par latgalīšu volūdys lītuotuoju skaitu Latvejā i Latgolā. Napretendejam iz analitisku apsavieršonu, vaira viņ pamatinformaceja, kū analizēt i izdareit secynuojumus var kotrs pots.

1. Latgalīšu volūdys lītuotuoju skaits Latvejis regionūs. Vysu vaira latgalīšu volūda teiri logiski teik lītuota Latgolys regionā, kur tū lītoj 97 590 cylvāku, kas procentuali sastota gon viņ napylnu trešū dali nu vysim regiona īdzeivuotuojim (304 032 cylv.) – 32,1 %.

2. Latgalīšu volūdys lītuotuoju skaits republikys nūzeimis piļsātuos. Latgalīši ir vysur, bet kai radzams, tod nu republikys piļsātom vysvaira jī dzeivoj Reigā – 29 393 cylvāku, ūtruo piļsāta ar leluokū latgalīšu volūdys lītuotuoju skaitu ir Rēzekne. Nu, ka pasaver procentuali, tod Reigā latgalīšu volūdu lītoj 4 % Tautys skaiteišonā registrātūs īdzeivuotuoju, Rēzeknē attīceiba ir vysu leluokuo – 37 %, Daugovpilī 8 %, Jākubpilī 7 %, Jiurmolā 4 %, Jalgovā 3 %, bet Līpuojā, Ventspilī i Valmīrā latgalīšu volūdu lītoj pa 2 % nu itūs piļsātu īdzeivuotuojim.

3. Latgalīšu volūdys lītuotuoju skaits Latvejis nūvodūs. Prīceiguokuo viests ir, ka nav taida Latvejis nūvoda, kur nabyutu kaida latgalīšu volūdys lītuotuoja. Vysu mozuok latgalīšu volūdu lītoj Kūrzemis pusē Vaiņuodis nūvodā – 8 cylvāki, nu vysu leluokais latgalīšu volūdys lītuotuoju skaits 15 836 cylvāku ir Rēzeknis nūvodā. Nu pasaverūt itūs datus procentuali, saīt, ka vysu vaira nu vysu nūvoda ļaudim, latgalīšu volūdu lītoj Kuorsovys i Baļtinovys nūvodūs – 78 % nu nūvodu īdzeivuotuojim latgalīšu volūdu lītoj kasdīnā. Gondreiž tikpat daudzi – 76 % nu nūvoda īdzeivuotuojim latgalīšu volūdu lītoj ari Vuorkovys nūvodā. Vaira kai 60 % nu vysim nūvoda īdzeivuotuojim latgalīšu volūdu lītoj Varakļuonu (67 %), Ciblys (67 %), Rībeņu (63 %) i Vileks (62 %) nūvodūs. Skumeiguok ir, ka cytūs Latgolys nūvodūs latgalīšu volūdu lītoj mozuok. Vysu mozuok nu Latgolys nūvodim latgalīšu volūdys lītuotuoju iz Zylupis nūvodā – viņ 10 %. Ka pajam nūvodu videjū ruodeituoju, najamūt vārā republikys piļsātys (Rēzekni i Daugovpili), tod saīt, ka nūsaceituos lauku teritorejuos latgalīšu volūdu kasdīnā lītoj gondreiž puse (49 %) vysu nūvodu īdzeivuotuoju, kas ir daudzi leluoks par īprīšk nūsauktū vysa regiona (ar piļsātom) videjū statistiskū ruodeituoju – 32,1 %, kuortejū reizi pīruodūt latvyskuma i leidza ar tū latgaliskuma problemys Latgolys lelajuos piļsātuos.

Apsavērt tabulu par vysim nūvodim (nūvodi sakuortuoti piec alfabeta)

4. Latgolys regiona latgalīšu volūdys lītuotuoju dzimumvacumstruktura. Latgalīšu volūdu kasdīnā lītoj ļauds vysuos vacuma grupuos – nu mozu bārnu da siermgaļvu. Vārojama gon tendence, ka latgalīšu volūdys lītuošona sasamazynoj mozu bārnu vydā, kas varātu byut skaidrojams ar tū, ka jūs vacuoki niu ir ļauds 25 – 34 godu vacumā, kas vysu mozuok nu pīaugušajim runoj latgaliski. Dzimumvacumstruktura paruoda, ka vysu vaira latgaliski runoj, roksta ci kai cytaiž lītoj volūdu ļauds vacumā nu 45 da 54 godu, bet pateikama ir ari jaunūs ļauds vacumā nu 15 da 24 godu volūdys lītuošona, kas vysu tycamuok lela daļa ir jūs (45 – 54 godu īdzeivuotuoju) bārni.

Print Friendly, PDF & Email

Komentari

Kalenders

Mar
28
Cat
18:30 Izruode “Divejis vyrtuvē, naskai... @ Daugovpiļs teatris
Izruode “Divejis vyrtuvē, naskai... @ Daugovpiļs teatris
Mar 28 @ 18:30 – 20:00
Izruodis pamatā ir ukraiņu dramaturga Aleksandra Mardaņa luga “Muotis i meitys” (“Дочки-матери”), lugu latgaliski tulkuojuse Kristīne Veinšteina. Tei byus gondreiž kriminala komedeja Olega Šapošnikova režejā i viesteis par div liktiņa nalutynuotom sīvītem, kurys par speiti vysim[...]
19:00 Grupys “Galaktika” albuma prezen... @ CATA kulturys noms
Grupys “Galaktika” albuma prezen... @ CATA kulturys noms
Mar 28 @ 19:00 – 21:00
2024. gods zīmā i pavasarī – nu janvara da apreļa – popularuo šlagermuzykys grupa “Galaktika” dūsīs Latvejis koncerttūrē, kurys laikā tiks prezentāts ari jaunais albums “Mums pieder tik daudz”. Koncerti nūtiks gondreiž vysu Latvejis piļsātu[...]