Kuorsovys nūvoda jaunīšu centrs “Pūga”

Kuorsovys nūvoda jaunīšu centrs “Pūga”

Ituo goda 16. junī Kuorsovys nūvoda dūmis konfereņču zalā nūtyka uzjiemiejdarbeibys seminars „Ir ideja? Naguli! Apsteigs!”, kū reikuoja poši jaunīši – Kuorsovys nūvoda jaunīšu konsultativuo padūme i Jaunīšu centrs ”Pūga”. Seminara mierkis beja īdrūsynuot jaunīšus tikt par uzjiemiejim i ar mentoru paleidzeibu dūt praktiskus padūmus uzjiemiejdarbeibys suokšonai. Tok kas ir “Pūga” i kaidi ir Kuorsovys nūvoda jaunīšu mierki i gryuteibys, stuosta Antra Lipska.

Myusu dīnu paradokss – jaunīši, kuri nadora nikuo, i jaunīši, kuri paspiej pabyut vysur i izdareit vysu. Antra Lipska, kurei vuicuos Kuorsovys vydsškolā, Kuorsovys nūvoda jaunīšu padūmē puorstuov sovu pogostu, dorbojās Muokslys školā, doncoj tautys deju kolektivā, vuicuos profesionali biļdeit i pa vydu tam vysam rauga sekmeigi pabeigt školu. Jei atzeist, ka šaļtim jai ir dusmis par tū, ka volda taida vīnaldzeiba nu jaunīšu pusis, bet, nu ūtrys pusis, kotram ir sova izviele. Kas vīnam ir lobs, cytam var nasaruodeit svareigs!

Leidz ar nūvoda reformom Latvejā roduos situaceja, ka daudzūs jaunajūs nūvodūs tryuka dažaidu instituceju. Pīmāram, bejušais Ludzas rajons sasadaleja 4 nūvodūs. Ludzā jau daudzu gadu desmitu gaitā beja izaveiduojs vītejū rajona jaunīšu centrs. Niule tys ir Ludzys nūvoda teritorejā. Puorejī apleicīnis nūvodi palyka tukšā… Institucejis kotrā nūvodā, prūtams, tyka izveidotys, tūmār darbinīki i tradicejis, kurys jau beja izstruoduotys godu gaitā, tyka pazaudātys. Juopaīt laikam, lai pruots pīrostu pi jaunuos situacejis i vierzīņa, kurā juosadūd. Jau ir paguojs puora godu nu jaunuos sistemys suokuma, tūmār tryukumu vēļ daudz, partū juostruodoj vēļ vairuok.

Leidz ar reformu Kuorsovys nūvodā tyka izveiduota Jaunīšu konsultativuo padūme i jaunīšu centrs ”Pūga”, kam i aizdavums apvīnuot nūvoda jaunīšus i dorbuotīs jūs interesēs. Itymā godā jaunīšu centrs „Pūga” beidzūt tiks pi sovys eistys sātys – nūvoda dūme ir īdavuse telpys. Teik eistynuoti dažaidi projekti: vysaidu īkuortu īguodei, seminaru i dažaidu pasuokumu reikuošonai, hokeja laukuma apreikuošonai i t.t. Dorbs īt iz prīšku, radzams progress gon reikošonā, gon dažaidu projektu raksteišonā. Daudz kur paleidz sadarbeibys partneru padūms i īdrūsynuojums.

Varātu dūmuot, ka vyss nūteik gludi… Tūmār, kai ir nūvāruojušs nūvoda jaunīši, aktivitate nūvoda apkuortnis jaunīšu vydā sasmozynoj! Breižim ruodīs, ka pasuokums teik reikuots viņ sev pošim, puorejī apleicīnis jaunīši naizruoda interesi. Vyspuorejs paneikums… apateja… vīnaldzeiba? Var tikai minēt īmesļus, kuru deļ reikuotī pasuokumi teik tik švaki apmaklāti. Navarātu saceit, ka tei ir vīneigi Kuorsovys pusis suope, ari cytur jaunīši palīk arviņ kiutruoki. Sarunys laikā ar Antru nasarūn puorlīceiba, ka leluoks jaunīšu skaits īsasaisteis nūvoda jaunīšu padūmis i centra „Pūga” reikuotajuos aktivitatēs.

Tūmār, kai soka, cereiba mierst pādejuo. Reizem atlīk viņ atrast pareizū cylvāku, kurs var paviļkt sev leidza daudzus! Juosuoc meklēt!

Vaira informacejis par Kuorsovys jaunīšu centru “Pūga” i jūs pasuokumim meklej ITE.

Nūbeigumā divejis kinys par miseju “Zīdūņs” – kai Kuorsovys pusis jaunīšim guoja ituo goda Lelajā tolkā Malnovā, kod parkā tyka salaseiti nūlauztī zori i atkrytumi, sakostys lopys i izteireiti kryumi, ībetoneiti vyngruošonys stīni. Vīns nu interesnuokūs atrodumu – zemē īaudzs metala čainiks. Pavysam tolkā pīsadaleja vaira kai divdesmit jaunīšu.

Pyrms

Piec

Ar Kuorsovys pusis jaunīšim apsarunuoja Čyganu Santa

Karteņā – Kuorsovys nūvoda jaunīši Lelajā tolkā, karteņa nu “Pūgys” arhiva

Print Friendly, PDF & Email

Kalenders

Mar
28
Cat
18:30 Izruode “Divejis vyrtuvē, naskai... @ Daugovpiļs teatris
Izruode “Divejis vyrtuvē, naskai... @ Daugovpiļs teatris
Mar 28 @ 18:30 – 20:00
Izruodis pamatā ir ukraiņu dramaturga Aleksandra Mardaņa luga “Muotis i meitys” (“Дочки-матери”), lugu latgaliski tulkuojuse Kristīne Veinšteina. Tei byus gondreiž kriminala komedeja Olega Šapošnikova režejā i viesteis par div liktiņa nalutynuotom sīvītem, kurys par speiti vysim[...]
19:00 Grupys “Galaktika” albuma prezen... @ CATA kulturys noms
Grupys “Galaktika” albuma prezen... @ CATA kulturys noms
Mar 28 @ 19:00 – 21:00
2024. gods zīmā i pavasarī – nu janvara da apreļa – popularuo šlagermuzykys grupa “Galaktika” dūsīs Latvejis koncerttūrē, kurys laikā tiks prezentāts ari jaunais albums “Mums pieder tik daudz”. Koncerti nūtiks gondreiž vysu Latvejis piļsātu[...]