Sabīdryskais pasyutejums juonūdrūsynoj ari laidīnim latgalīšu volūdā

Sabīdryskais pasyutejums juonūdrūsynoj ari laidīnim latgalīšu volūdā
Nacionaluo elektroniskūs plašsazinis leidzekļu padūme (NEPLP) ir pījāmuse Elektroniskūs plašsazinis leidzekļu nūzaris atteisteibys nacionalū strategeju 2012. – 2017. godam.

Vīns nu golvonajim strategejis mierkim ir sabīdryskūs medeju styprynuošona i reforma, palelinojūt medeju lūmu nacionaluos kulturys identitatis styprynuošonā i latvīšu volūdys, tymā skaitā latgalīšu volūdys, lītuošonā. Tik pot svareigs mierkis ir nūdrūsynuot informacejis telpu latvīšu volūdā i nacionalūs elektroniskūs plašsazinis leidzekļu apraidi vysā Latvejis teritorejā, jo eipaši austrumu pīrūbežā.

Strategejis sadalis „Elektroniskūs plašsazinis leidzekļu likuma pīmāruošona” septeitajā punktā izsvārts, ka juonūdrūsynoj sabīdryskū pasyutejumu laidīnim latgalīšu volūdā.

Kai nūruoda NEPLP lūceklis Daiņs Mjartāns, Elektroniskūs plašsazinis leidzekļu nūzaris atteisteibys nacionaluo strategeja ir uorejs normativs akts, kas juridyskā spāka hierarhejā pīleidzynoma Ministru kabineta nūsacejumim i stuosīs spākā piec publiciešonys oficialajā izdavumā „Latvijas Vēstnesis”.

D. Mjartāns: „Strategejis topšonā tyka jimti vārā īsacejumi, kas izskanieja kulturys ministrejis reikuotajā konfereņcē Vuorkovā „Latgalīšu volūda i latgaliskuo identitate”. Kab jau itūgod veiksmeigi rysynuotu sabīdryskū pasyutejumu laidīnim latgalīšu volūdā i nacionalūs elektroniskūs plašsazinis leidzekļu apraidis nūdrūsynuošonu austrumu pīrūbežā, vālams vaļdeibys apstyprynuojums budžeta grūzejumim.”

MK puorresoru koordinacejis centra vadeibā sataiseits Vaļsts puorvaļdis instituceju (tymā skaitā NEPLP), navalstyskūs organizaceju i socialūs partneru puorstuovu pīduovuotūs pasuokumu saroksts. Kab īdzeivynuotu sadali „Prioritari nu vaļsts budžeta atbolstomī pasuokumi sabīdreibys salīdiešonai i nacionaluos identitatis styprynuošonai” paradzāts pīpraseit nu vaļdeibys 50 000 latu lelu finansiejumu sabīdryskajam pasyutejumam konkursa kuorteibā regionalajim i vītejim elektroniskajim plašsazinis leidzeklim (t.sk. komercialajim) i producentu grupom Latgolys regionā kai ari 7800 latu finansejumu Latvejis Radejis programys LR1kasnedelis raidejumam par Latgolu i latgalīšu kulturu latgaliski.

Ar pylnu Elektroniskūs plašsazinis leidzekļu nūzaris atteisteibys nacionalū strategeju 2012. – 2017. godam var īsapazeit http://www.neplpadome.lv/lv/padome/normativie-akti/nacionala-strategija/

Print Friendly, PDF & Email

Kalenders

Mar
28
Cat
18:30 Izruode “Divejis vyrtuvē, naskai... @ Daugovpiļs teatris
Izruode “Divejis vyrtuvē, naskai... @ Daugovpiļs teatris
Mar 28 @ 18:30 – 20:00
Izruodis pamatā ir ukraiņu dramaturga Aleksandra Mardaņa luga “Muotis i meitys” (“Дочки-матери”), lugu latgaliski tulkuojuse Kristīne Veinšteina. Tei byus gondreiž kriminala komedeja Olega Šapošnikova režejā i viesteis par div liktiņa nalutynuotom sīvītem, kurys par speiti vysim[...]
19:00 Grupys “Galaktika” albuma prezen... @ CATA kulturys noms
Grupys “Galaktika” albuma prezen... @ CATA kulturys noms
Mar 28 @ 19:00 – 21:00
2024. gods zīmā i pavasarī – nu janvara da apreļa – popularuo šlagermuzykys grupa “Galaktika” dūsīs Latvejis koncerttūrē, kurys laikā tiks prezentāts ari jaunais albums “Mums pieder tik daudz”. Koncerti nūtiks gondreiž vysu Latvejis piļsātu[...]