Paziņuoti tautys skaiteišonys rezultati par latgalīšu volūdys lītuojumu Latvejā

Paziņuoti tautys skaiteišonys rezultati par latgalīšu volūdys lītuojumu Latvejā

Latvejis Republikys Centraluo statistikys puorvaļde šudiņ izplatejuse informaceju par 2011. goda martā nūtykušuos tautys skaiteišonys laikā īgiutajim rezultatim – atbiļdem iz vaicuojuma, voi respondents lītoj latgalīšu volūdu.

Tautys skaitiešonys rezultati ruoda, ka Latvejā 2011. goda 1. martā beja 164,5 tyukstūšys personu, kas kasdīnys lītoj latvīšu volūdys paveidu[1] — latgalīšu volūdu (iz prīšku — latgalīšu volūda). Vysu vaira latgalīšu volūdu lītoj Latgolā, kur dzeivoj 97,6 tyukstūšys latgalīšu volūdā runojūšu personu. Saleidzynojūši daudz latgalīšu volūdas lītuotuoju ir sastūpams ari Reigā — 29,4 tyukst. i Pīreigys regionā — 14,4 tyukst.

Latgalīšu volūdu kasdīnys lītoj 8,8 % Latvejis īdzeivuotuoju, sovukuort tūs storpā, kuri sātā vaira lītoj latvīšu volūdu, latgalīšu volūdā kasdīnys runoj 10,6 %. Īdzeivuotuoju storpā, kuri sātā vaira lītoj krīvu volūdu, latgalīšu volūdā kasdīnys runoj tik 5,8 %.

Vyspuor zynoms, ka vysu vaira latgalīšu volūda teik lītuota Latgolā, kur trešuo daļa īdzeivuotuoju (35,5 %) jū lītoj kasdīnys. Juoatzeimoj, ka latgalīšu volūdu kasdīnys lītoj 71,9 % nu latvīšu volūdā runojūšūs i 12,3 % nu krīvu volūdā runojūšūs Latgolys īdzeivuotuoju.

Vysu vaira latgalīšu volūda teik lītuota Kuorsovys, Baļtinovys i Varakļuonu nūvodūs, kur vaira kai treis catūrtuos dalis īdzeivuotuoju kasdīnys lītoj latgalīšu volūdu. Latgolys lelajuos piļsātuos latgalīšu volūda teik lītuota saleidzynojūši rešuok — Rēzeknē jū kasdīnys lītoj 40,5 % īdzeivuotuoju, Daugovpilī kasdīnys tik 9,3 % sasarunoj latgaliski.

Deveni nu desmit Cyblys (94,7 %), Kuorsovys (94,0 %), Rībeņu (91,5%), Rēzeknis (90,9 %), Baļtinovys (90,0 %) nūvodu latvīšu volūdā runojūšūs īdzeivuotuoju kasdīnys lītoj latgalīšu volūdu. Tok Latgolys lelūs piļsātu latvyski runojūšūs īdzeivuotuoju vydā latgalīšu volūda teik lītuota rešuok — Rēzeknē 76,9 % i Daugovpilī 46,3 %.

Dīvamžāļ nu vīnā laika momentā fiksātuos informacejis teišus sacynuojumus par latgalīšu volūdā runojūšūs īdzeivuotuoju skaita izmaiņom navar izdareit. Tok, viertejūt natīši, juoatzeist, ka latgalīšu volūdu kasdīnys vaira lītoj vacuoka goda guojuma Latvejis īdzeivuotuoji. Ka leidz 20 godu vacumam latgalīšu volūdu lītoj tik 6 % īdzeivuotuoju, tod piec 70 godu vacuma latgalīšu volūdu kasdīnys lītoj jau gondreiž 10 % īdzeivuotuoju. Bez tuo latgalīšu volūdā runojūšūs videjais vacums ir 46,2 godi, kas ir augstuoks nakai Latvejis īdzeivuotuoju videjais vacums 41,6 godi. Atsasaucūt tik iz itūs rezultatu, var izsaceit prognozi, ka iz prīšku latgalīšu volūdā runojūšūs skaits varātu sasamazynuot.

Detalizāta informaceja par 2011. goda tautys skaitiešonys rezultatim, t. sk. latgalīšu volūdys lītuošonu, ir publicāta CSP sātyslopā.

[1] 9,3 % Latvejis īdzeivuotuoju nasnīdze atbiļdis iz vaicuojumu par volūdu lītuošonu. Apriekinūs par latgalīšu volūdys lītuošonu lītuoti tik atbiļdiejušūs īdzeivuotuoju dati.

Vaira dazynuošonys –

CSP Informacejis departaments
Uldis Ainārs
67366920

Print Friendly, PDF & Email

Komentari

Kalenders

Mar
28
Cat
18:30 Izruode “Divejis vyrtuvē, naskai... @ Daugovpiļs teatris
Izruode “Divejis vyrtuvē, naskai... @ Daugovpiļs teatris
Mar 28 @ 18:30 – 20:00
Izruodis pamatā ir ukraiņu dramaturga Aleksandra Mardaņa luga “Muotis i meitys” (“Дочки-матери”), lugu latgaliski tulkuojuse Kristīne Veinšteina. Tei byus gondreiž kriminala komedeja Olega Šapošnikova režejā i viesteis par div liktiņa nalutynuotom sīvītem, kurys par speiti vysim[...]
19:00 Grupys “Galaktika” albuma prezen... @ CATA kulturys noms
Grupys “Galaktika” albuma prezen... @ CATA kulturys noms
Mar 28 @ 19:00 – 21:00
2024. gods zīmā i pavasarī – nu janvara da apreļa – popularuo šlagermuzykys grupa “Galaktika” dūsīs Latvejis koncerttūrē, kurys laikā tiks prezentāts ari jaunais albums “Mums pieder tik daudz”. Koncerti nūtiks gondreiž vysu Latvejis piļsātu[...]