Ceļš iz sātu /Latgalīša pādi pasaulī

Ceļš iz sātu /Latgalīša pādi pasaulī
Latgolys Studentu centrs jau puora godu īdybynuojs pasuokumu sereju „Latgalīša pādi pasaulī”, kur izzynoj par latgalīšu ceļojumim, dzeivi i dorbu cytuos pasauļs vaļstīs. Itūreiz „pādus” Austrejis zemē pamets Raitis. Itys nabyus stuosts par tū, kai jam tī guoja, bet vaira par tū, kai raudzieja atsagrīzt sātā.

Vasali,

ir paguojuši 5 mieneši nu tuos dīnys, kod aizbrauču dabuot zineibys Austrejā. Paļdis ERASMUS programai. Pīdzeivuoju natryuka. Vēļ vaira – tī nasabeidze da pošai pādejai dīnai.

Vyss suocās ar tū, ka beja juosaplanavoj ceļš iz sātu. Gribieju dreiži i bez suopem, nu ar kaidu ūdzeņu. Tai nu pasyuteju lidmašinys biletu nu Baden Baden (Vuocejā) iz Reigu, koč ari pots dzeivuoju Zalcburgā, Austrejā. Izlyku sev izaicynuojumu iz lidūstu braukt ar stopim.

Socialajūs portalūs izrunuoju Matiasu (Matthias), kurs brauc ar mašinu nu Zalcburgys iz Minheni i ir gotovs pagiut kaidu leidzbraucieju ļusteiguokai kompanejai i izdeveiguokam braucīņam, dolūt benzina izmoksys.

Nūrunuojom vītu, laiku i ceļs varieja suoktīs. Sarunys raisejuos gona labi, eisti nazynu, kas beja pi vainis – ci leidzeiguos iņteresis ci varbyut juo dorbavīta – RedBull. Pībylsšu, ka RedBull nav viņ energejis dzierīni. Pasaulī, vēļ vaira Austrejā, tys ir dzeivisveids suocūt ar dažaidom ekstremom sporta aktivitatem i beidzūt ar RedBull šykaladim i čajim.

Pamozeišam tyvojamīs Minhenei, i es zynuoju, ka mani tī jau gaida. Beja planavuots, ka par nakti palikšu pi Minhenis studentim. Matiass aizvede mani da pilsātai i beja laiks izmeklēt jaunīšu dzeivisvītu – nikam gryutam navajadzātu byut, ka ir zynoms adess. Daži mudri puorbraucīni ar pazemis viļcīni – piļsāta vys tik nav nikaida mozuo. Kod asu nūklivs da eistajam kvartalam, suocās pīdzeivuojumi – kod suoc vaicuot ceļa vītejim. Ej i saprūta deļ kuo tai, nu 80 % nu vaicuotajim mani vede naceļūs. 5 minotu guojīņs izvierte diveju stuņžu mekliejumūs. Tys nav cik prīceigi šaļtī, kod juonas 50 kilogramu smoga bagaža. Pa munam, vuocīšim ryup i pateik paleidzēt, nu ari tod, kod jī nav puorlīcynuoti. Izadeve lobs treneņš ar sumkom i snīgadieli. Bet nu beigys laimeigys i izguoju iz pareizuo ceļa.

Ļustis var suoktīs – īsapazynu ar vītejim i daudzim cytu vaļstu gostim. Par nakti palyku studentu kūpmeitnēs, kur pogroba stuovā ir klubs. Skaņ izaicynūši i, prūtama līta, mes naguojom gulātu. Īsapazynu ar daudzim „divana sārfuotuojim”.

Nuokušā dīnā daguoja tei ceļuojuma „ūdzeņa” – pādejūs 400 km da lidūstai nūbraukt ar stopom. Atsazeišu, ka maņ tys beja lels izaicynuojums, deļ tuo, ka svešuos zemēs itū vēļ nabeju raudziejs, koč ari gribiešona beja jau seņ. Tī, kas reizi ir raudziejuši, saprass, ka ceļuot itaidā veidā ir daudzi interesantuok, kas ļaun īpazeit pasauli vēļ vaira. Saprūtams, ka ir ari sovs risks, deļ tuo juobyut cīši pīsardzeigim.

Nakts ļustis saguoja cīši lobys i nu reita daže aizagulieju, kuo rezultatā palyka mozuok laika stopiešonai iz Baden Baden. Cerieju reitu suokt ap 8 stuņdem reitā, nu saguoja viņ ap pušdīnis laiku 12.

Nikū dareit – iz Latveju gribīs i nedeļgols jau saplanavuots. Dūmuoju riskēt. Ci tys atsamoksuoja – par tū stuosts iz prīšku.

Nūstuovieju kaidus 40 minotus, kod beidzūt mani pagiun mašine, kas brauc iz sasatikšanu natuoļ nu Štutgartis. Tys ir pa ceļam i maņ dar. Veirīts beja veirīša lobuokajā vacumā, nu cik jauts, ka es pat saceitu students korstojūs studenta godūs. Ceļā pavadejom ap 2 stuņžu. Jis stuosteja stuostus par ceļuošonys prīcu i sovim pīdzeivuojumim pasaulī. Laiks paskrieja vieja spuornim.

Šopereits izlaide mani pi kaidys kopejneicys, tīpat lelceļš. Īsaveru stuņdinīkā… 14:40… saprūtu – nabyus labi. Lidūstā vuorti taisuos cīši 17:05, pyrma tam juonūdūd bagaža, i pyrma lidojuma tī vuorti teik slāgti kai īrosts 40 minoti pyrma tuo. Ceļa vēļ 140 kilometri, nu pyrma tam juoatrūn mašine… Izaklausa naīspiejami daže maņ, jamūt vārā munu īprīškejūs pīdzeivuojumu pīredzi.

Piec 30 minotu gaideišonys par laimi dabrauc kaids nu mugorys jaunā mersedesā. Kai izaruoda – jauns veirīts vuordā Ahmads. Dzims Turcejā, audzs Vuocejā i niu jau 10 godu struodoj Mercedes uzjāmumā. Nu pots interesantuokais – juo dorba pīnuokums ir braukuot apleik ar pošom jaunuokajom Mercedes mašinem – brauc, kur acs ruoda. Izaklausa dīzgon breinumaini, nu vys tik ir sovi nūsacejumi – jam nedeļā juonūbrauc na mozuok par 2000 kilometrim. Breineigs darbeņš i par tū moksoj 3 reizis leluoku olgu kai videjam vuocīšam. Pīļaunu, ka lelai daļai skaiteituoju tys varātu byus sapynu dorbs. Ahmads vēļ reizi puorvaicoj, iz kureini maņ juobrauc, dasokūt, ka reitu ir īceriejs ar sīvu dabraukt iz Parizi, nu šudiņdīnai planu navā, deļtuo var mani nūvest, kur viņ es grybu. Breineigi! Jutūna izalobuoja iz vysa symta, smaids i jautrys sarunys puorejū ceļa gobalu da lidūstai. Kab vys tik vyss naītu tai gludi – pa ceļam vēļ iz šosejis pasagadeja ari puora mozu sastrāgumu. Nu gols golā lidūstā beju 16:30 i sasajutu tik laimeigs, jo iz lidmašinu pagivu i veiksmeigu atliduoju iz sātu.

Piec ituo pīdzeivuojuma asu saprats – nikas dzeivē nav naīspiejams, golvonais ir ticēt, izadreikstēt i nasabeit riskēt, pījamūt napruoteiguokūs izaicynuojumus sovā dzeivē. Dzeivoj kai gribi, ar smaidu i dzeivis baudeišonu, kas padora laimeigu Tevi i Tev apleicejūs!

Raitis

Print Friendly, PDF & Email

Kalenders

Mar
28
Cat
18:30 Izruode “Divejis vyrtuvē, naskai... @ Daugovpiļs teatris
Izruode “Divejis vyrtuvē, naskai... @ Daugovpiļs teatris
Mar 28 @ 18:30 – 20:00
Izruodis pamatā ir ukraiņu dramaturga Aleksandra Mardaņa luga “Muotis i meitys” (“Дочки-матери”), lugu latgaliski tulkuojuse Kristīne Veinšteina. Tei byus gondreiž kriminala komedeja Olega Šapošnikova režejā i viesteis par div liktiņa nalutynuotom sīvītem, kurys par speiti vysim[...]
19:00 Grupys “Galaktika” albuma prezen... @ CATA kulturys noms
Grupys “Galaktika” albuma prezen... @ CATA kulturys noms
Mar 28 @ 19:00 – 21:00
2024. gods zīmā i pavasarī – nu janvara da apreļa – popularuo šlagermuzykys grupa “Galaktika” dūsīs Latvejis koncerttūrē, kurys laikā tiks prezentāts ari jaunais albums “Mums pieder tik daudz”. Koncerti nūtiks gondreiž vysu Latvejis piļsātu[...]