Laura Bicāne byus ari jaunūs dzīsminīku koncerta, kas byus 11. augustā, vadeituoja. Koncerta organizātuojim Laurys snīgums cīši īpasatics Laurys dzīšmu vokorā Reigā, Rokkopejneicā ituo goda pavasarī.

Saīts ir na viņ leluokais dzīsminīku festivals, nu tys ir ari sasatikšonys i kūpā byušonys svātki, klauseituojim tei ir breineiga īspieja vīnā vītā redzēt i dzierdēt dažaidus latvīšu dzīsminīkus – gon lobuok i mozuok zynomus, gon ari jaunūs talantus.

Itūgod saītā pīsadaleis taidi dzīsminīki: Valdis Otuols, Elīna Leice, Egons Pičners, Kārlis Kazāks, Kristaps Sudmaļs, Ēriks Pozemkovskis, Laura Bicāne, Andris Mičuļs, Haralds Seimaņs, Maija Kalneņa, Uldis Kākuļs, Ēriks Lūks, Bruoli Zīmeli, Arņs Milteņš, Juoņs Jansons, Kaspars Dimiters, Raimonda Vazdika, Varis Vātra, Ilze Grunte, Dace Prīduleņa, Baiba Dēķena, Dinārs Gulbis, Elīna Starke, Juoņs Cirveļs, Andris Diržininkas, Vilņs Punka, Līva Vilneite, Dace Kaša, Laura Lō, Silvestrs Seiļs, Paula Uobuleņa Uobula, Skranda, Inese Vonoga, Īva Styure-Styureņa, Paula Bogomolova i c. Dzejnīku ailēs saītā pīsadaleis dzejnīki Valdis Bisenīks, Arvīds Ulme, Agita Draguna, Māris Salējs, Inta Rīksteņa, Jana Egle i c. Taipat byus ari breivais mikrofons ar īspieju kotram grybātuojam pīsadaleit ar sovom dzīsmem ci dzeju.

Saīta programa:

10. augusts
20:00 Saīta atkluošonys koncerts „nu saknem”, guņs rytuali
24:00 Koncerti i dzejis skaitejumi pi tematiskajim guņkurim

11. augusts
11:00 – 18:00 Radūšuos darbneicys, jaunū dzejnīku „Dzejas kašķis”, dzīšmu vuiceišonuos, dzīšmu gleznuošona i c.
12:00 Koncerts bārnim
16:00 Jaunū dzīsminīku koncerts „Asnu spēks”
20:00 Saīta nūslāguma koncerts „Saulē augt”, guņs rituali
24:00 Koncerti i dzejis skaitejumi pi tematiskajim guņkurim

12. augusts
12:00 Saīta nūslāguma rituals

Vaira par saītu skaiti: http://www.austrasbiedriba.lv/2012/07/sadziedasim-vislatvijas-dziesminieku.html

Laura Bicāne – jaunuo dzīsmineica nu Daugovpiļs nūvoda, sovom dzīsmem melodejis i vuordus roksta poša. Koč ari vysu bīžuok Laura uzastuoj vīna, jei ari prīcu muzycej kūpā gon ar draugim nu grupys „Dabasu Durovys” i sovom muosom – Jacintu i Agnesi. Muzykys školā Laura apgivuse akordeona spēli, nu tai kai juos mama Marta Bicāne ir muzykys školuotuoja, tod sātā instrumentu gona, kurūs vydā atsaroda ari gitara. Dzīsmineica da itam vysvaira pīsadaliejuse latgalīšu muzykys koncertūs i festivalūs (Muzykys Skrytuļs, Made in Latgola, La-La-Dra), kai ari reikuojuse poša sovus autorvokorus. Itymā godā Laura sajiemuse Latgalīšu kulturys Goda bolvu „Boņuks” par lobuokū debeju latgalīšu muzykā.

.

.
Dace Kaša – dzīsmineica ar saknem nu Baļtinovys. 2010. godā juos dzīduotuo dzīsme „Sirsneņa” sajiemuse Latgalīšu kulturys Goda bolvu „Boņuks” kai lobuokuo latgalīšu alternativuo/underground styla dzīsme. Dace ar dūmubīdrim puorstuov kristeiguos muzykys žanru. 2010. godā izguoja Dacis albums „Ieskaujošais vairākums”.

.

.
Laura Lō – eistajā vuordā Laura Ločmele – mārga nu Bolvim. Pošvuiceibys ceļā īsavuicejuse gitarspēli, sacar i izpiļda sovys dzīsmis pamatā angļu volūdā.

.