Dzejis mieneša sasatikšona Rēzeknis Centralajā bibliotekā

Portals lakuga.lv 19. Septembris, 2012. gods Comments Off on Dzejis mieneša sasatikšona Rēzeknis Centralajā bibliotekā
2012. goda 27. septembrī 13.00 Rēzeknis Centraluos bibliotekys konferenču zālā byus sasatikšona ar nūvodpietnīku, literatu i tulkuotuoju Leonardu Rakicki.

Pasuokumā izskanēs L. Rakicka latgaliski tulkuotuo pūļu dzejneicys Konstancis Benislavskys (1747–1806) dzeja, kai ari poša literata dzejis skaitejumi. Taipat bibliotekys skaiteitovā apsaveramys K. Benislavskai i L. Rakicikm veļteitys izstuodis.

Leonards Rakickis ir dzims 1953. goda 8. novembrī Kuorsovā, vuicejīs Malnovys sovhoztehnikumā, nakluotīnē absolviejs Reigys Politehniskuo instituta Elektroenergetikys fakultati. Struoduojs sovhozā „Lozdukolns”, niu – Eglainis pamatškolā. Paraleli dorbam školā jis ir nūvodpietnīks i aktivs kristeiguos dzeivis popularizātuojs. Nūpītni pietejs Benislavsku dzymtu, sasarakstejs ar arhivim i pietejs bazneicys gruomotys. L. Rakicka latgaliskī tulkuojumi nu K. Benislavskys dzejūļu kruojuma „Sev dzīduotuos dzīsmis” i vysaidi viesturiskī apceriejumi i personiskūs puordūmu dorbi skaitami izdavumūs „Tāvu zemes kalendars”, „Gaismas Taka & Zemturs” i „Olūts”. Informacejis olūts ITE

Konstance Benislavska dzymuse 1747. goda 6. janvarī nabadzeigā muižnīku Riku dzymtā. Cīš jauna apsapreciejuse ar Pīteri Benislavski, kura dzymtai pīderiejušys vairuokys muižys tagadejuo Bolvu nūvoda teritorejā. K. Benislavskys saraksteituo dzeja izdūta gruomotā ar nūsaukumu „Piešni sobie špiewane…” („Sev dzīduotuos dzīsmis”), gruomota īspīsta Viļnī 1776. godā. Dzejis nūzeimeibu aplīcynoj tys, ka 1958. godā itei gruomateņa Pūlejā izdūta nu jauna. K. Benislavskys dzejis paraugi īkļauti vairuokūs Pūlejis nacionaluos dzejis izdavumūs, tei ir ari pieteita. Myužeibā K. Benislavska nūguojuse 1806. goda 8. novembrī. Informacejis olūts ITE

Informaceju sagatavieja – Rēzeknis Centraluo biblioteka

Komentari slāgti.