Rakstejom, ka 5. i 6. oktobrī paradzātuos pyrmizruodis puorcaltys, nu jaunī izruožu datumi ir 16. oktobris plkst. 18:30, 28. oktobris plkst. 18:00, 30. oktobris plkst. 18:30.
Iz 5. i 6. oktobra izruodem nūpierktūs biletus Daugovpiļs teatra kasē (tel. 65426520) var sameit iz biletim kaidā nu itim datumim ci naudu.

Biletus iz 5. oktobra izruodi var sameit pret naudu da 16. oktobrim, nu biletus iz 6. oktobra izruodi da 28. oktobrim. Vaira informacejis: 654 26520 ci 65426720.

Daugovpiļs teatris atsavainoj par saguoduotajom naierteibom!

Atguodynuosim, ka „Vosorys saulgrīžu burvesteibys” ir Viljama Šekspira romantiskuokuos komedejis „Sapyns vosorys naktī” latgaliskuo interpretaceja, kurys autore ir rakstneica Monika Zeile.

Monikys Zeilis tulkuots i pīmāruots, Šekspira klasiskais lugys sižets i varūni teik puorcalti iz Latgolu ar tai rakstureigū skatejumu iz dzeivi, temperamentu i ījiukšonom. Jaunīstudejuma režisors Viktors Jansons atkluoja, ka izvadumā grib runuot par mīlesteibu, sadolūt tū pa daļom, kab kotru nu tuom apsavārtu pa sevim. Taipat izruodis režisors lugys sižetu skateituojim īceriejs padūt naparostā veidā, izruodis prīškplanā izvierzūt kusteibu i skonu.

Vīnu nu golvanojom lūmom izruodē spēlēs Latvejis skotivis humora meistars Juoņs Jarāns, kurīs eipaši aicynuots daleibai jaunīstudejumā i kuram tei byus debeja Daugovpiļs teatrī. Interesns fakts, ka sovu aktera karjeru, muokslenīks suoce ar lūmu taišni Šekspira lugā „Sapyns vosorys naktī”.

Izruodis pamatā ir stuosts par četrim meilātuojim, kurī dažaidu intrigu i puorpratumu rezultatā teik īrauti nabeidzamā karsmis vārputa, atkluojūt tū, cik mīlesteiba var byut okla i cik dažaidi te var ītekmēt kotru nu mums.

Režisors: Viktors Jansons
Scenografi: Ivo Folkmanis, Nataļja Marinoha, Viktors Jansons
Horeografs: Jeļena Jekimova
Kostimu muokslineica: Nataļja Marinoha
Muzyka: Arturs Uškāns, Stanislavs Šimanskis

Lūmuos: Juoņs Jarāns, Ivars Brakovskis, Alda Krasteņa, Jurijs Losevs, Māris Korsiets, Māris Susejs, Karina Lučinina, Inese Ivulāne-Mežale, Ritvars Gailums, Egils Viļumovs, Kristīne Veinšteina, Maija Oļeņina i c.

Bileti nūpārkami Daugovpiļs teatra kasē (t.65426520), „Biļešu paradīzes” kasēs vysā Latvejā i škārsteiklā www.bilesuparadize.lv.