Rēzeknē školuotuojim prezentēs latgalīšu volūdys korpusu

Rēzeknē školuotuojim prezentēs latgalīšu volūdys korpusu
Rēzeknē, 2012.goda 29.oktobrī nūtiks seminars latvīšu volūdys i literaturys školuotuojim par jaunu volūdys tehnologeju lītuošonu klasē. Seminara ītvorūs tiks demonstrāts ari pyrmais latgalīšu myusdīnu rokstu volūdys korpuss, kuru veidoj Rēzeknis Augstškolys (RA) i LU Matematikys i informatikys instituta (LU MII) vadūšuos pietnīcis Ilzis Spergys vadeibā projekta „HipiLatLit” ītvorūs.

Volūdys korpuss ir digitālu tekstu datu kruojums, kas teik apstruoduots ar eipašom datorprogramom, lai īgiutum datus par bīžuok lītuotajim vuordim i par kaida konkrēta vuorda lītuojumu. Pasaulē pyrmī volūdys korpusi tyka radeiti jau 20.gs. 60.godūs i leidz myusu dīnom tī ir klivuši par naatjamamu sastuovdaļu volūdys plānuošonā, pietnīceibā, vuordneicu veiduošonā i.c. Projekta „HipiLatLit” laikā veiduotais korpuss ir pyrmais latgalīšu myusdīnu rokstu volūdai, tymā tiks īkļauts vīns miļjons vuordlītuojumu.

Seminarā Rēzeknē školuotuoji dazynuos vaira ari par lītišķuos volūdnīceibys nūzari korpuslingvistiku, par korpusu izveiduošonu, par korpusa datu izgiušonu i apstruodi, kai ari īgyutuos zynošonys varēs likt lītā praktiskuos nūdarbeibuos. Apvuiceibys nūtiks Rēzeknis Augstškolā, plānuotais apjūms ir 6 akademiskuos stuņdis, daleiba bez moksys.

Lai pīsadaleitu seminarā, īprīškeja dasasaceišona ir obligata da 22.oktobram. Vairuok informacejis par seminaru i dasaceišonu ir dalyktajā dokumentā.

Seminars školuotuojim Rēzeknē teik reikuots kai vīna nu Latvejis – Lītovys programmys projekta „HipiLatLit” aktivitatem. Projekta laikā kūpš 2011.goda suokuma nūteik dorbs četrūs vierzīņūs: teik veiduots paralelais latvīšu – lītovīšu i lītovīšu – latvīšu korpuss, specialais latgalīšu rokstu volūdys korpuss, „Lītovīšu-latvīšu-latgalīšu volūdys vuordneica”, kai ari sagatavuota doktoranturys studeju programma baltistikā. „HipiLatLit” sasnāgumi tiks ruodeiti plašuokai auditorejai 8.-9.novembrī RA konferencē „Regionaluo pīviļceiba i ilgtspieja globaluos lokalizacejis laikmetā”.

Projektu „HipiLatLit” realizej RA sadarbeibā ar Vītauta Dižuo Universitati (Kauņa, Lītova) i LU MII. Projekta budžets ir 395 758,00 EUR, no kurim 336 394,30 EUR ir atbolsts nu Latvejis–Lītovys programys i 59 363,70 EUR nacionalais finansiejums.

Seminars_Školuotuojim_Aproksts

Informaceju sagatavuoja Anna Briška, projekta „HipiLatLit” koordinatore

Karteņa – RA publicitatis materiali, foto Māris Justs

Print Friendly, PDF & Email

Kalenders

Mar
30
Sai
15:00 Izruode “Divejis vyrtuvē, naskai... @ Daugovpiļs teatris
Izruode “Divejis vyrtuvē, naskai... @ Daugovpiļs teatris
Mar 30 @ 15:00 – 16:30
Izruodis pamatā ir ukraiņu dramaturga Aleksandra Mardaņa luga “Muotis i meitys” (“Дочки-матери”), lugu latgaliski tulkuojuse Kristīne Veinšteina. Tei byus gondreiž kriminala komedeja Olega Šapošnikova režejā i viesteis par div liktiņa nalutynuotom sīvītem, kurys par speiti vysim[...]
Mar
31
Svā
all-day Izstuode “Latgales keramikas stā... @ Daugovpiļs Muola muokslys centrs
Izstuode “Latgales keramikas stā... @ Daugovpiļs Muola muokslys centrs
Mar 31 all-day
Da 31. marta Daugovpiļs Muola muokslys centra izstuožu zālē apsaverama Tautys lītiškuos muokslys studejis “Latgale” izstuode “Latgales keramikas stāsti”, kurā apkūpuoti studejis lobuokī dorbi, viestej informaceja Daugovpiļs piļsātys sātyslopā. “Kotrys dorbs sovā byuteibā ir unikals i naatkuortojams, kotram[...]