„Kolnasāta” paleidzēs veicynuot Latgolys kulturvidis, vierteibu i tradiceju saglobuošonu i atteisteibu. Klauseituojim byus vareiba pasavērt iz itū Latvejis nūvodu caur interesnim i īdvasmojūšim Latgolys personeibu stuostim, volūdys boguoteibu i īsaklauseit vītejūs latgalīšu dūmuos.

Pusstuņdi garajā raidejumā byus vairuokys dalis aba sātys ustobys. „Nedelis nūtikšonu skreine” byus pasavieršona iz aktualitatem Latgolys sociālajā, ekonomikys, kulturys i sporta dzeivē. Korespondentu reportažuos izskanēs latgalīšu dūmys i komentari par nūtikšonom dažaidūs dzeivis laukūs. Kotru nedeļu „Kolnasātā” gasteis kaida eipaša personeiba. Laidīņs pīduovuos ari latgalīšu volūdys vuordineicu audio formatā.

Latgalīšu teicīņs viestej: „Ka cylvāks pats zyna, kur gryb tikt, pasauļs jam ceļu taisa”, deļ tuo „Kolnasāta” raudzēs nūdrūsynuot latgaliskuo napagaisšonu i turpynuošonu, īdvasmojūt, izgleitojūt i prīcejūt radejis klauseituojus.

Radejis laidīņa radūšuo komanda ir treis latgalīši – raidejuma producente ir rēzeknīte i žurnaliste Daira Kokoreviča, „Kolnasātys” vadeišona i saiminīka vīta uzticāta muzikim, reklamys zynuotuojam i TV i radeju raidejumu vadeituojam Aigaram Runčim, par volūdu i latgaliskū raidejuma komandu konsultēs literaturzynuotneica, publiciste i latgalīšu gruomotu redaktore Ilze Sperga. Taipat par vuordineicys skaniejumu i volūdys apgivi ryupētīs paleidzēs literaturzynuotnīks, dzejnīks i pasnīdziejs Valentins Lukaševičs.

Pyrmajā latgalīšu raidejumā „Kolnasāta” Arņs Slobožaņins nu Daugovpiļs sagataviejs reportažu par latgalīšu volūdys lītojumu Daugovpiļs piļsātys i apleicīnis školuos – voi školāni runoj i gryb runot latgaliski? Kū par tū soka školuotuoji? Voi latgalīšu volūdu vajadzātu vuiceit ci vadeit kaidys stuņdis latgaliski? Pyrmuos nedelis gosts „Kolnasātā” byus akters Juoņs Jarāns saisteibā ar Šekspira latgaliskuos interpretacejis „Vosorys saulgrīžu burvesteibys” pyrmizruodi Daugovpiļs teātrī. Jarāns izruodē spielej golvonū lūmu. Dzierdiesit juo dūmys par lugu, latgalīšu volūdu i aktermeistareibu. Taipat sarunu papildynuos ari interveja ar Māri Korsieti, kurs Šekspira latgaliskajā variantā spielej vīnu nu lūmom. Jis pasadaleis sajiutos par izruodi i latgaliskū raksturu. Literats Valentins Lukaševičs īpazeistynos klauseitojus ar latgalīšu vuorda „skrincis” skaidruojumu, izceļsmi i raksturos tū ar pīmārim. Taipat dzierdēsit jaunuokū nūtikšonu izkluostu i zeimeigu datumu saisteibu ar Latgolai svareigim nūtykumim i personeibom.

Raidejumu „Kolnasāta” pīduovuosim nūsaklauseit ari Latgalīšu kulturys gazetā. Taipat raidejuma komanda gaideis LaKuGys skaiteituoju atsauksmis, īsacejumus i kritiku lobuokam dorbam iz prīšku.

Pateikamu klauseišonūs!