Latgalīšu danči Daugovpilī byus vēļ

LaKuGa 23. Oktobris, 2012. gods 3
Latgalīšu danči Daugovpilī byus vēļ
Ituo gods 17. oktobrī Latgolys Studentu centrs kūpā ar Daugovpils nūvoda Kulturys centra folklorys kūpu „DYRBYNI” vysus kojuos nūsolušūs i doncuot grybūšūs pulcynuoja vīnuvīt – Daugovpiļs nūvoda Kulturys centrā „Vārpa”. Lela prīca beja par tik daudzim Latgalīšu danču interesentim un tikpat lela par multikulturalū sastuovu, bet kai zynoms – auss, rūkys, kuojis i vysi puorejī organi myusim vysim ir vīnaiduoki.

Kab lobuok sasadoncuotu, suokumā vajag ari īpasazeit, kū Latgalīšu danču aktivisti ari veiksmeigi izdareja i tod jau Dyrbyni aicynuoja vysus dzīduot i doncuot. Guojam gon sienīs baraviku lauzti, gon arī Oiru sadoncuot. Nivīns spāka nataupeja, jo uzsvēra, ka itaida energejis nūvadeišona ir cīši veseleiga paraleli lekceju apmekliejumam. Piec vysys ļustiešonys tyka veikta arī atkluotuo anketiešona ar vaicuojumim – voi maņ patyka, voi es atīšu vēļ i voi es pajimšu kaidu leidza? Sajemūt apstiprynūšys atbiļdis, Latgolys Studentu centrs i Dyrbyni sūleja nuokušū sūpluoksaīšonu. Vāluok sekuoja diskusejis i atsapyušona pi čaja, pošcaptim peirāgim i cytim gordumim. Vysim leidza tyka īdūtys pozitivys emocejis, smīklu šaļts, atminis par bierneibu, minūt kaidu pazeistamu deju sūli i syltums, kuru kotrs varieja īlikt sev kuldā, sūmā voi nūnest rūkuos.

Itī breineigī Latgalīšu dzīšmu i deju svātki, kuri nūtyka Daugovpilī, tyka aizvadeiti sūlejūt jaunys i jaunys sasatikšonys.

Komentari slāgti.