Šudiņ ar dokumentaluos kinys „Fedja” pyrmizruodi atkluos Teuvo Tulio kinu nedeļu

LaKuGa 1. Novembris, 2012. gods 1,618

Ar režisoris Kristīnis Želvis dokumentaluos kinys „Fedja” pyrmizruodi šudiņ, 1. novembrī 19:00 kinuteatrī „Splendid Palace” tiks atkluota Teuvo Tulio kinu nedeļa. Kai īprīšk viesteits, atzeimejūt Latgolā dzimušuo suomu kinu režisora Teuvo Tulio (eistajā vuordā Teodora Tugaja, 1912-2000) symts godu jubileju, „Splendid Palace” nu 1. da 6. novembram byus kinu nedeļa „Fedja. Teodors. Tulio”.

„Fedja.Teodors.Tulio” īkļautys pīcys kinys, kas taiseitys laikā nu 1938. – 1947. godam i itūšaļt teik izskateitys par suomu kinu klasikys pērlem. Tulio kinu nedelis nūsaukumā apvīnuoti treis vuordi, kurymūs dažaidūs dzeivis periodūs saukts sovpataeigais režisors: krysteitais vuords Teodors, režisora pseidonims Tulio, nu sovā Latgolys bierneibā puika saukts par Fedju. Tulio kinu nedelis laikā skotoma Kristīnis Želvis dokumentaluo kina „Fedja” pīsavierš Tulio bierneibys laikam Latgolys sādžā – kai Latgolys ainava, sadzeive. Tulio naparostuo dzymta i puikys bierneibys puordzeivuojumi i īspaidi piečuok pasaruoda juo režisātajuos kinuos.

Pasasokūt Suomejis Kinu arhīva atbolstam, Tulio kinys tiks demonstrātys nu 35 mm kinu kopejom. Nu kina „Fedja” topuse Anša Epnera studejā AVE, sadarbeibā ar Suomejis studeju Kinoproduction Oy. Kinys operators – Ivars Zviedris, producenti Ivars Zviedris, Kristīne Želve, leidzaproducents – Klāss Olsons. Ituo gods augustā kina ruodeita Suomejis sabīdryskuos televizejis kanalā Yle Teema Tulio jubileja mieneša programā.

Yle Teema sātys lopā par kinu viesteits: „Tulio dzymtuos sādžys ainavā Želve atrūn Tulio kinu katalogu – arhetipi, puorsavārtuši tālūs, kliust par Tulio kinu objektim. Kinys, ainavys i Tulio dzeivisstuosts taisa Kristīnis Želvis melanholiskū i fascinejūšū dokumentalū kinu.”

Kinu nedelis atbaļsteituoji: Vaļsts Kulturkapitala fonds, Reigys dūme, Suomejis Audiovizualais arhivs, Suomejis viestnīceiba Reigā, Reigys nomi i „Splendid Palace”, Suomejis Tierdznīceibys kamera i kompaneja HRX, SIA „Liviko”, laikroksts „Diena”, bars „Karjala”, kompaneja „Fazer”.

Kartenis – publicitatis materiali.

Komentari slāgti.