Vēļ tik itū nedeļu da 10. novembram Reigā, Latvejis Nacionaluos bibliotekys izstuožu zalā apsaverama Latgolys Kulturviesturis muzeja, Bolvu centraluos bibliotekys i Latvejis Nacionaluos bibliotekys kūpeigi taiseituo izstuode „Latgolys dvēselis tulkam Mikeļam Bukšam 100”, kas nu Rēzeknis aizceļuojuse iz Reigu.

Izstuodē apsaveramys Mikeļa Bukša viestulis, foto kartenis i gruomotys, juo leidzgaitnīku – Aļberta Pleiša, Konstantina Poča, Vladislava Lōča – atminis par M. Bukša dzeivi i darbeibu, izstuodi papyldynoj videomateriāli par M. Bukša dzeivisbīdrinis Janīnys Bukšys pādejū gasteišonu Latvejā 20. gs. 90. godūs.

Mikeļs Bukšs (1912-1977) – literaturzynuotnīks, kulturys viestuis pietnīks i sabīdryskais darbinīks, byudams trymdā Zvīdrejā, izdeve gruomotys latgalīšu volūdā, saglobojūt i sekmejūt volūdys atteisteibu.

Piečuok izstuode byus apsaverama Bolvūs, Baļtinovā, Vilekī i cytūs Latvejis nūvodūs. Projektu atbolsta VKKF Latgolys kulturys projektu programma.

Vaira par izstuodi skaiti ITE

Karteņā: Latgolys Kulturviesturis muzeja, Bolvu centraluos i Latvejis Nacionaluos bibliotekys darbinīki kūpā ar M. Bukša meitu (2. ryndā trešuo nu lobuos), znūtu i mozdālim izstuodis atkluošonā Latvejis Nacionalajā bibliotēkā Reigā, 2012. gods 5. oktobrī. Foto nu Bolvu centraluos bibliotekys arhiva.