Šudiņ, 9. novembrī 18:00 „Latgolys Radejis” ēterā izskanēs pyrmais raidejums jaunā raidejumu cyklā latgaliski „Pi myusu Latgolā!”. Pyrmais raidejums byus veļteits uzjiemiejdarbeibai Latgolys regionā i vaļdeibys izstruoduotajai atbolsta programmai „Vareibu Latgola” (Iespēju Latgale).

Raidejums „Pi myusu Latgolā!” sastdiņ 16:00 skanēs ari vītejuos Rēzeknis radejis „Ef-Ei” ēterā, taipat tū varēs atrost i nūsaklauseit škārsteikla lopuos lakuga.lv, latgale.lv i i-rezekne.lv.

Pyrmajā raidejumā par uzjiemiejdarbeibys īspiejom i problemsituacejom Latgolā runuos Rēzeknis uzjiemieju bīdreibys vaļdis lūcekle Skaidrīte Baltace, Latgolys Regiona atteisteibys agenturys direktors Māris Bozovičs, kai ari uzjiemieja, kurys vuords Latgolā komentarus vaira navaicoj, Vija Ancāne i cyti.

Raidejuma laikā tiks raudzeits nūskaidruot ci uzjiemiejdarbeiba Latgolā ir iztikys olūts ci hobejs, kai ari apzynuots pīejamūs finanšu instrumentu izlītojums Latgolā.

Raidejumu cykls „Pi myusim Latgolā!” teik taiseits Nacionaluos Elektroniskūs plašsazinis leidzekļu padūmis reikuotuo konkursa „Par raidejumu taiseišonu regionalajūs i vītejūs elektreoniskajūs plašsazinis leidzekļūs, kas raida radeju programys, Latgolys regionā” ītvorūs.

Raidejumu cyklu taisa producentu grupa SIA „Lietišķā Latgale”, pīaicynojūt vītejūs žurnālistus, i da ituo goda beigu planavuots sataiseit ostiņus raidejumus par Latgolys regionā aktualom i nūzeimeigom temom kai administratīvi teritorialuo reforma i tuos ītekme iz īdzeivuotuoju kasdīnu, latgalīšu volūdys aktualizaceja, tautīšu reintegraceja i cytys.

SIA „Lietišķā Latgale” pyrma tam ir izdavuse taida poša nūsaukuma kasnedelis gazetu par uzjiemiejdarbeibu Latgolā, kai ari gataviejuse radejis raidejumu cyklu „Latgolys Radejā” par Eiropys Parlamentu.

Karteņā – Aglyunys “Maizis muzeja” vadeituoja Vija Ancāne, foto no muzeja publicitatis materialim