Itei dīna beja na tikai LgSC dzimšonys dīna, bet ari vysu biroju ­— Reigys, Daugovpiļs i Jelgovys — sasatikšonuos dīna. Īsaroda ari vīns nu LgSC pyrmajim idejis autorim — Arvis Soldāns, kurs pastuosteja par LgSC naoficialū i piec tam jau ari oficialū bīdreibys rasšonūs i darbeibu. Arvis uzsviere, ka radeit koč kū jaunu ir vīgli, bet podtureit i atteisteit ir gryuši, deļtuo izsaceja lelu pateiceibu i apbreinu par tū, ka LgSC jau sviņ  septeitū dzimšonys dīnu. Taipat tyka pasaceits, ka tikai nu bīdru atkareiga bīdreibys izaugsme. Tai kai LgSC ir sasnīdzs pyrmklasnīka vacumu, ir vēļ kur augt i tīktīs, ar tū tikai vyss suocās. Parosti pyrmklasnīkim sūmuos salīk vysaidus lobumus, deļtuo vokors tyka pavadeits, izviertejūt pašreizejū dorbu i planavojūt, kas paredzeits nuokūtnī. Beja ari intelektualuo pasuokuma daļa, kurā vysim tyka dūta vareiba pīsadaleit viktorinuos par latgalīšim aktualū i vierteigū kulturā i volūdā. Vysim bīdrim beja īspieja apsavērt vacuokys i jaunuokys biļdis nu LgSC pasuokumim, tys beja kai lels gimenisks virtualuo albuma skateišonuos breids. LgSC prīšksādātuojs Raitis beja saryupiejs dzimšonys dīnys torti, i, dzīdūt „Daudz boltu dīneņu”, vysi sasajuta kai gaviļnīki, deļtuo ka myusūs kotrā ir leluoka voi mozuoka LgSC daleņa. Eimūt eistā latgalīšu piertī, varēja atsabreivuot nu vysa nalobuo, kas sasakruojs, i vysu vokoru pavadeit smīklu šaļtī.

Pyrmajā vokorā dančim vareibys nabeja, deļtuo bīdri izadoncuošonu sareikuoja nuokušajā dīnā. Trauki arī pleisa, i tys nūzeimej – iz laimi! Paļdis vysim, kas īsaroda, i tim, kuri ar myusim beja dūmuos i dūmeņuos.