Rēzeknē atkluos kasgadejū Latgolys muokslenīku dorbu izstuodi

LaKuGa 15. Novembris, 2012. gods Comments Off on Rēzeknē atkluos kasgadejū Latgolys muokslenīku dorbu izstuodi
Rēzeknē atkluos kasgadejū Latgolys muokslenīku dorbu izstuodi
Reitu, 16. novembrī 15:00 Latgolys Kulturviesturis muzejā Rēzeknē jau 17. reizi piec kuortys Latvejis dzimšonys dīnys svieteišona īsasuoks ar Latgolys muokslenīku dorbu izstuodi „RUDENS 2012”.

Izstuodis atkluošonā pīsadaleis muokslinīki i byus vareiba satikt ari latgalīšu muziki Sovvaļnīku. Izstuode muzeja byus apsaverama da 15. decembra.

Ituo goda izstuodē pīsadola 65 Latgolys profesionalī, aktivi struodojūšī i Latvejis Muokslys akademejā studejūšī jaunī muokslenīki – dažaidys paaudzis, dažaidys dzeivis pīredzis i dažaidi izapausmis veidi, nu vīnoj vysus kotrā muokslys dorbā „īkodātuo” energeja.

Muokslenīki, kuru dorbi apsaverami izstuodē, īt nu Rēzeknis, Daugovpiļs, Preiļu, Viļānu, Leivuona, Kuorsovys, Ruguoju, Vīseitis, Reigys piļsātom i nūvodim, pīduovojūt pādejuo goda laikā taiseitūs 98 muokslys dorbus – gleznys, akvareļus i grafikys, tekstilmuokslys, tielnīceibys i keramikys dorbus.

Tradicionali piec izstuosis, pasasokūt Rēzeknis piļsātys dūmis atbolstam, žurejis īsaceitī dorbi tiks īpierkti muzeja kruojumā i papyldynuos myusdīnu Latgolys muokslys kolekceju.

Ituo goda izstuodē pīsadola vaira muokslenīku kai cytim godim – izstuodē „Rudens 2011” pīsadaleja 56 autori ar 80 dorbim, „Rudens 2012” – 51 autors ar 77 dorbim, tai aplīcynojūt Latgolys muokslys stabilitati i jaunu ideju eistynuošonu.

Izstuodi Latgolys Kulturviesturis muzejā var apsaviert ūtrdinem, trešdinem, catūrtdinem, pīktdinem nu 10:00 da 17:00, sastdinem nu 10:00 da 16:00, svātdinem i pyrmudinem – slāgts. Īejis moksa školānim i studentim 0,20 Ls, pīaugušajim 0,40 Ls, pyrma školys vacuma bārnim – breiva.

Galerejā apsaverami puora izstuodis „RUDENS 2012” dorbi, A. Bondarenko foto.

  1. Inga Onževa „Rudens gūstā”, 2012, kartons, olejs, 121,2×74,3 cm
  2. Dana Zelča „Rožleju plūmes”, 2012, audaklys, akrils, 55×45 cm
  3. Jurika Bakāne „Mazliet līst”, 2012, audaklys, olejs, 70×50 cm
  4. Silva Linarte „Gaismas spēle”, 2012, kartons, akrils, 57,5×77,5
  5. Agra Ritiņa „Veltījums meitenēm – defilē”, 2012, saplāksnis, olejs, 96×38 cm
  6. Ilvija Juškeviča „Dabas spēks”, 2011, audaklys, olejs, 62×78 cm

Komentari slāgti.