Latvejis suokys ir Rēzeknē!

LaKuGa 16. Novembris, 2012. gods 11
Rēzeknis piļsātys i nūvoda inteligencis, izjiemieju i pašvaļdeibu puorstuovi Latvejis naatkareibys proklamiešonys godadīnys prīškvokorā aicynoj puordūmuot sovus piļsātys, Latgolys i Latvejis nuokūtnis īspiejamūs atteisteibys scenarejus i nasaļaut lātom provokacejom par Latgolys separatisma i diskriminacejis idejom, nu saprast, ka itūšaļt ir laiks atdabuot sovu nacionalū pošapziņu i tuos lobuokuos vierteibys i centīņus virzeit piļsātys i Latgolys izaugsmei. Deļtuo 18. novembrī 17:30 kotrs teik aicynuots iz sasadzīduošonu i kūpeiga izsaukuma pījimšonu. Byusi gaideits pi Rēzeknis Augstškolys, Atbreivuošonys alejā 90. Ka tī ir vaicuojumi, kas iztrauc ari Tevi, esi vīnu nu myusu Latvejis dzimšonys dīnā!

IZSAUKUMS LATVEJIS ĪDZEIVUOTUOJIM

Pādejā laikā Latvejia nalabvieleigūs politiskūs spāku saceitais par Latgolys separatismu roda draudus cylvākdrūšeibai Latgolā.

Latgolys regiona ekonomiskuos atteisteibys nagativuos tendeņcis i latgalīšu rokstu volūdys vajadzeiguo atteisteiba navar i nadreikst kolpuot par īmesli Latvejis vaļsts pamatvierteibu graušonai. Latgolys kongress 1917. godā i tuo simboliskais mantinīks, pīmineklis “Vienoti Latvijai”, aplīcynoj Latgolys vīnuoteibu ar cytim Latvejis nūvodim.

Itymā Latvejis naatkareibys proklamiešonys godadīnā napīļausam myusu vaļsts škelšonu. Latgola ir bejuse i palyks naatjemama Latvejis vaļsts sastuovdaļa ar sovom kulturviesturiskajom, etniskajom i ekonomiskajom vierteibom, kuru atteisteišona ir myusu pošu i myusu delegātūs politiku rūkuos!

Nav pīļaunams, ka Latvejis proklamiešonys godadīnā izrunā īdzeivuotuojim skaņ: “Es sveicu Jius Jiusu svātkūs!” Kotrs nu myusu ir vaļsts suokys i pamats – mes asom Latveja!

Latvejis suokys ir Rēzeknē!

Iniciativys grupa: Edmunds Teirumnieks, RA rektors, Ilga Šuplinska, RA zinuotņu prorektore, Ināra Groce, „A 12” žurnala redaktore, Līvija Plavinska, Nautrānu pagasta puorvaļdis vadeituoja, Māris Igavens, biznesa inkubatora „Ideju viesnīca” vadeituojs, Valdis Stepiņš, Latgolys partejis vaļdis lūceklis, Juris Guntis Vjakse, SIA „Dzieti” saiminīks, Ernests Jurkāns parteju savīneibys „Latgales sirds” vaļdis lūceklis, Juris Viļums, 11. Saeimys deputats 

Komentari slāgti.