Jaunīšu lītu specialists i Austrumlatvejis radūšūs pakolpuojumu centra „Zeimuļs” gitarspēlis školuotuojs Guntis Rasims sataiseja cīši veiksmeigu i interesnu pasuocīni, tam pīsaistūt na viņ pazeistamū latgalīšu grupu „Dabasu Durovys”, nu ari taidus sovys lītys zynuotuojus kai Alvi Bernānu (grupa „Green Novice”), Ingaru Gusānu („Sovvaļnīks”, „Borowa Mc”), James Travor Boterill (Apvīnuotuo karaliste, „Jacobs Ladder”) i c. Pasuocīni boguotuoku padareja dažaidu stylu, tumā skaitā, rokenrola i smoguo metala izpiļdeituoji. Projekta laikā jaunīšim beja vareiba īsavuiceit skotuvis aparaturys izvītojumu, spēlis i dasliegsonys eipatneibys, īpasazeit ar pīredzejušim pasnīdziejim, izklauseit jūs padūmus. Gola dīnā varieja pabyut koncertā, kurymā skanieja gon pazeistami, gon jauni skaņdorbi.

Nautrānu vydsškolā Foruma laikā vaļdeja pozivita nūskaņa, gitaristu skaņom narymstūt. Dzīžūt, smejūt i ci vīnkuorši atsapyušūt, jaunīši kotru breidi pavadeja liriskūs rytmūs, i pusnakts stuņdi stuņdinīks naizsyta, cikom pādejuo nota napīklusa. Nūdarbeibu laikā beja vareiba īsavuiceit i atkuortuot basgitarys eipatneibys, akordus i c. gitarspēlis knifus, elektriskuos i akustiskuos gitarys specifikys, ritma nūsaceišonu, bungu komplekta komponentu atškireibys, skotuvis sistemys darbeibys i tt. Kai ari angļu volūdys zynuošonys vajadzieja mudri pīsleipēt, runojūt ar Džeimsu i klausūtīs juo stuostūs par poša britu muokslenīka ar muzyku saisteitū dzeivi. Sekojūt retoriskam Džeimsa vaicuojumam: „Voi Jius gribat spēlēt sev ci vys tik publikai?”, zalā īsastuoja klusums, i jis turpynuoja, stuostūt par tū, kai, tics Latvejā, muzikis bejs puorsteigs, radzūt, cik daudz, saleidzynojūt ar kūpejū gitarys spālātuoju skaitu vaļstī, ir cīši lobu i profesionalu gitaristu; tautai adrasātajai izteikšonai sekuoja mīra šaļts, īdvasma i atguodynuojs, ka dzeivuot ir vareiba ari dzimtinē – gryuteibys, gribiešona tuos puorvarēt padora myus stypruokus, tei dzan myus īt iz kū lobuoku, i atrūnam tū taišni tī, kur naīsadūmojam meklēt – ite.

Projekta laikā dabuotuo pīredze i zynuošonys, naaizmierstamuo kūpā byušonys i vīnuoteibys sajiuta nūteikti padora itaidys nūtikšonys cīši aktualys i nūzeimeigys na viņ Latvejis, nu ari Latgolys muzykys izaugsmei. Ituo goda Forumā pīsadaleja puorstuovi nu desmit Rēzeknis nūvoda pogostim i, tam izabeidzūt, reizē ar pyrmū snīgu, jaunīši nagribeigi škeirēs kotrs iz sovu pusi.

Jākubs Silanžs, ARPC žurnalistikys puļceņa dalinīks

Karteņuos – Foruma dalinīki daboj jaunys zynuošonys gitarspēlē, jaunīši īpazeist jaunus akordus, Foruma pādejuos nakts breivuos pēlis koncerts.

Latgolys Regionaluos televizejis sižets par gitaristu sasatikšonu