Kinys “Fedja” pyrmizruode Latvejis Televizejā

LaKuGa 30. Novembris, 2012. gods Comments Off on Kinys “Fedja” pyrmizruode Latvejis Televizejā

Šudiņ 18:30 Latvejis Televizejis 1. programā pyrmū reizi tiks ruodeita režisoris Kristīnis Želvis kina „Fedja” par latgalīšu izceļsmis kinu režisoru Teuvo Tulio.

Pyrmizruodi Suomejā kina pīdzeivuoja ituo goda augustā, Latvejā pyrmu reizi ruodeita 1. novembrī kinuteatrī „Splendid Palace”, Reigā, nu niu kuorta ari televizejis skateituojim vysā Latvejā.

Teuvo Tulio (eistajā vuordā Teodors Tugajs) ir latgalīšu puika, kuru dzeive nūvad iz Suomeju, kur jius kliva par akteri, piečuok slavanu, nu aizmiersteibā krytušu režisoru. Fedja – tai bierneibā puiku sauce vītejuos sādžys ļauds. Kristīnis Želvis dokumentaluo kina „Fedja” pīsavierš Tulio bierneibys laikam Latgolys sādžā – kai Latgolys ainava, sadzeive. Tulio naparostuo dzymta i puikys bierneibys puordzeivuojumi i īspaidi piečuok pasaruoda juo režisātajuos kinuos.

Lela daļa kinys ir latgaliski i paraleli viestejumam par režisora bierneibu, koloriti paruoda ari Latgolys lauku cylvākus myusu dīnuos. Vītejī ļauds Rēzeknis nūvoda Iļziskolna pogostā niu nazyna taida Teuvo Tulio i, kod kinys taiseituoji vaicoj satiktajim veirim, kur ir juo pīmineklis, tī dūmoj, ka teik izjūkuoti – kaids tod ite slavans režisors varātu byut!? Sovaids ruodīs ari dzeivis pretstats: vītejim cylvākim Tulio nikuo naizsoka, nu juo atguoduot i apsavērt pīminekli brauc ļauds nu pošys Suomejis. Kaids tod ir Fedjis, Teodora i Teuvo stuosts? Tū verīs kinā šudiņ.

Kinys operators – Ivars Zviedris, producenti Ivars Zviedris, Kristīne Želve, leidzaproducents – Klāss Olsons.

Vaira par Teuvo Tulio skaiti: http://lakuga.lv/2012/08/23/teodoram-tugajam-aba-teuvo-tulio-100/

Kas bija Teuvo Tulio? from Kristine Zelve on Vimeo.

Komentari slāgti.