Sovulaik par sovom gonu gaitom saceja Zīmeļlatgolys teicieja Anna Ščemelinska (1925-2011) nu Škilbanu pogosta: „A kaidi koncerti seņuok, munā bierneibā, … kod es guoju gonūs! Mīgs. Nasagryb ceļtīs… Niu bārni guļ, cik grib! A tūlaik jau sešūs godūs beja juoīt gonūs. Pat pīcūs godūs! Nu i kod izguboja tymūs gonūs – ceiruleiši, laksteigolys, dzagiuzis, i kas tik vēļ nabej’… Vysi dzīduoja! Taids beja ansamblis, ka tu dzeivuoji vīnā prīcā. Vysa doba gavilieja!”

Myusu laikūs gaviliešona plašuok zynoma kai prīceiga, ļusteiga nūskaņuojuma skaļa izpausme. Dainuos gaviliešonai ir dažaidi konteksti. Tei var byut skaneiga, tuoli dzierdama komunikaceja storp cylvākim ci gonu, i juo lūpim. Nu tei var byut individuala vokaluo izpausme prīceigā emocionala pacāluma šaļtī. Gavilej ari gauži, leidz dzīsme izvad nu skumem, leidz otkon bolss pots lidoj leidza putynim dabasūs.

Trio „Šmite Kārkle Cinkuss” ir – tradicionaluos dzīduošonys školuotuoja i dzīduotuoja Zane Šmite, kura daudzi vuicejuse ari Latgolys, eipaši Zīmeļlatgolys dzīduotuojus, vijuolneica i dzīduotuoja Kristīne Kārkle-Puriņa, kas sovulaik dzīduojuse Leivuona „Ceiruleitī” i „Laimas muzykantūs”, kai ari kordirigents i dzīduotuojs Ivars Cinkuss. Grupa dorbojās nu 2008. goda, pīsadolūt koncertūs i festivalūs, kai ari snīdzūt dzīduošonys i spēlēšonys meistarklasis gon Latvejā, gon cytuos valstīs. Albuma īroksta taiseišonā kai gosts pīsadalejis ari „Ceiruleša”, „Auļi” i „Folkvakars” dalinīks Edgars Kārklis.

Albumā īkļautys 14 dzīsmis, nu kurom 5 skaņ latgaliski, pīvadumam, „Oi, egle, egle” nu Mednevys sīvu repertuāra, „Tolka muna lela tolka” nu Vydsmuižys, kai ari ituo goda Jaunīšu Etnodīnu Upeitē i Balkanūs dalinīkim pazeistamais „Vosoras bolss”, kuru školuotuoja Zane Šmite vuicieja dzīduošonys nūdarbeibā. Itū „Vosoras bolsu” septeņdesmitūs godu beiguos paslapan nu tuo laika politiskuos īkuortys Škilbanu sīvu dzīduošonā īraksteja Ontons Slišāns i prīsters Mikeļs Jermacāns. Niu dzīsme ar vīnkuoršū dzeivis gudreibu skaņ TRIO izpiļdejumā.

Albuma nūformejumā izmontuotys kartenis nu apguoda „Zelta grauds” 2007. godā izdūtuos Dagmārys Prībergys gruomotys „Senās mežģīnes Latvijā”.