Bolvu Centraluo biblioteka suminoj konkursu laureatus

Bolvu Centraluo biblioteka suminoj konkursu laureatus
Nūsaslāguši diveji Bolvu Centraluos bibliotekys konkursi – folklorys vuokuma konkurss „Apleicīne” i intelektuali izgleitojūšais konkurss „Prātnieks”.

Konkurss „Apleicīne”

Nūsasliedzīs 2. Latgolys folkorys vuokuma konkurss „APLEICĪNE”, kas beja veļteits nūvoda folklorys vuocieju aktiviziešonai i Ontona Slišāna dzeiviszinis pīminiešonai.

„Navaicojit, kam tys vyss vajadzeigs! Kotra darbeiba, kas veļ nūstyn apsyunojūšu akmini, lai tyktu palaista breiveibā dzeiveiba, kureimū tys pīmīdzs pošā juos plaukumā, ir cīši, cīši vajadzeiga.” (Ontons Slišāns).

Konkursa mierkis i aizdavumi beja apzynuot i atbaļsteit Latgolys nūvoda cylvākus, kurī vuoc, popularizej i sagloboj Latgolys folkloru jebkaidā izpausmē, taidā veidā turpynojūt O. Slišāna īsuoktuos tradicejis. Šuo konkursa organizatori beja          Bolvu Centraluo biblioteka sadarbeibā ar Bolvu nūvoda pošvaļdeibu, Vileks nūvoda dūmi, Rēzeknis Augstškolys Humanitarūs zynuotņu katedru, Latgolys regionalū televizeju.

Vuokumu konkursā varieja pīsadaleit sevkurs Latvejis īdzeivuotuojs, kas vuoc Latgolys nūvodu folkloru, sevkurs, kas savuocs sovys dzymtuos apleicīnis voi kaidys cytys Latgolys vītys eipatnejū, lokalū folklorys kluostu. Konkursā tyka īskaiteiti tī daleibnīku dorbi, kuri vierteišonai pīduovuoja vysmoz 5 puorsokys voi 20 tautys dzīsmis, voi 10 garuos dzīsmis, voi 10 – 20 eisuos folklorys vīneibys, voi cytys lokaluos folklorys izpausmis, pīmāram, vīnys vītys tradiceju aprokstu vārā jamamā apjūmā.

Kai konkursa cīneigs vuokums tyka skaiteits taids lokaluos folklorys vuokums,

kas nav publiciets leluokajūs folklorys izdavumūs,    kaidā konkretā pogostā voi cīmā pīraksteits folklorys vuokums, voi kaida konkreta cylvāka goreiguo montuojuma pīroksts. Vuokums, kas satur zinis par teicieju un ir īsnīgts originalvolūdā.

Konkursa organizatori sajieme 6 dorbus:

# Ilzis Pugačys vuokumu „Iz vacūsmuošu dzīšmu skreinis”(Tilža),
# Inesis Kolomejevys tautys dzīšmu vuokumu (Vacumu pog.),
# Annys Grīstenis vuoktū Bierzpiļs i tuos apleicīnis folkloru (Bierzpiļs pog.),
# Zitys Mežalis spieļu i rūtaļu vuokumu (Brīžucīma pog.),
# Brīžucīma pamatškolys latgalīšu puļceņa savuoktuo folklora (Brīžucīma pog.),
# Laumys Naglis latgalīšu folklorys apkūpuojums (Kuorsova).

Dorbus viertieja kompetenta komiseja:

1)      Andris Kazinovskis, Bolvu nūvoda dūmis prīšksādātojs. Jis ari komisejis gūda prīšksādātuojs.
2)      Ilga Šuplinska, Dr. philol. asoc. Rēzeknis augstškolys asociātuo profesore.
3)      Anna Rancāne, Latgolys regionaluos televizejis ziņu dīnasta vadeituoja.
4)      Andris Slišāns, Upeitis tautys noma vadeituojs.

Komiseja apsasprīžūt nūlēme, ka Laumys Naglis (Kuorsava) dorbs naatbiļst konkursa nūlykumam partū, ka savuoktuo folklora jau īprīšk ir bejuse publicāta folklorys izdavumūs.

Viertiešonys komiseja vīnpruoteigi izlēme pīškiert naudys bolvys šuodim konkursa daleibnīkim:

1)      Zitai Mežalei par spieļu i rūtaļu vuokumu (Brīžucīma pog.)
2)      Briežucīma pamatškolys latgalīšu puļceņam par savuoktū folkloru (Brīžucīma pog.)
3)      Annai Gīsteņai par Bierzpiļs i tuos apleicīnē savuoktū folkloru (Bierzpiļs pog.)
4)      Ilzei Pugačai par vuokumu „Iz vacūsmuošu dzīšmu skreinis” (Tilža)
5)      Inesei Kolomejevai par tautys dzīšmu vuokumu (Vecumu pog.)

Bet Laumai Naglei tiks nūsyuteita mīrynuojuma bolva nu Rēzeknis augstškolys i Bolvu Centraluos bibliotekys.
 

Konkurss „Prātnieks”

Bolvu Centrāluo biblioteka kūpā ar Zīmeļlatgolys gazetu „Vaduguns” reikoj intelektuali izgleitojūšu konkursu „Prātnieks”. Šūgod konkursa vaicuojumi beja veļteiti nūvodpietnīceibys temom. Juosoka, ka guoja gryuši, nu konkursa daleibnīki gūdam turiejuos. Vysgryutuokuos izaruodeja 5. kuorta par Mikeli Bukšu i 9. kuorta, kurys aizdavums beja sacerēt akrostihu. Šūgod atseviškis kuortys tika veļteitys taidim nūvodnīkim-jubilarim kai Mikels Bukšs, Pīters Apšinīks, Aļberts Garais (Lobreiteņš), Kārlis Ozolinš. Tika taiseitys ari eksperimentalys meikļu formys – burtu režgis, meikļu ryuts, rebuss, karte. Secynuojums – navajag nikū sarežgeit. Iz tū nūruodeja ari daleibnīku aktivitate. Pruotnīkim vaira pi sirds guoja vaicuojumu miksiejums par dažaidom temom, lītom, vītom. Vaicuojumūs, kur viesture teik sasaisteita ar myusdīnu dzeivi.

Kūpumā šūgod „Prātniekā” pīsadaleja 15 daleibnīki. Juopīmiņ, ka vysa goda garumā vysaktivuokais izaruodeja trejnīks nu Tilžys – Alvīne Mičule, Olga Zelča, Alberts Slišāns. Nu jim centēs naatpalikt arī Antonina Nalivaiko, Dominiks Svarinskis, Vija Ločmele, Irēna Svilāne, Rudīte Bistrova, Juoņs Usāns. Lels paļdis par daleibu ari Andim Rudukam, Ulrikam Pozņakam, Zitai Pulčai, G. Kreitiņam, Ievai Slišānei, Jurim Pošeikam.

Obeju konkursu daleibnīki teik aicynuoti 27. decembrī 11 stuņdēs iz Bolvu Nūvoda muzeju pi Mikeļa Bukša, kur ari nūtiks nūslāguma pasuokums. Vīta nav izraudzāta najauši. Šys pasuocīņs ir paradzāta ari kai simboliska sasatikšonys vīta Ontonam, Mikeļam i jūs gora mantinīkim.

Print Friendly, PDF & Email

Kalenders

Mar
30
Sai
15:00 Izruode “Divejis vyrtuvē, naskai... @ Daugovpiļs teatris
Izruode “Divejis vyrtuvē, naskai... @ Daugovpiļs teatris
Mar 30 @ 15:00 – 16:30
Izruodis pamatā ir ukraiņu dramaturga Aleksandra Mardaņa luga “Muotis i meitys” (“Дочки-матери”), lugu latgaliski tulkuojuse Kristīne Veinšteina. Tei byus gondreiž kriminala komedeja Olega Šapošnikova režejā i viesteis par div liktiņa nalutynuotom sīvītem, kurys par speiti vysim[...]
Mar
31
Svā
all-day Izstuode “Latgales keramikas stā... @ Daugovpiļs Muola muokslys centrs
Izstuode “Latgales keramikas stā... @ Daugovpiļs Muola muokslys centrs
Mar 31 all-day
Da 31. marta Daugovpiļs Muola muokslys centra izstuožu zālē apsaverama Tautys lītiškuos muokslys studejis “Latgale” izstuode “Latgales keramikas stāsti”, kurā apkūpuoti studejis lobuokī dorbi, viestej informaceja Daugovpiļs piļsātys sātyslopā. “Kotrys dorbs sovā byuteibā ir unikals i naatkuortojams, kotram[...]